Notícies Veir istoric
Era Escòla Mairau “Era Cunhèra” registre un important aument de matricula pendent 2016
Eth centre a compdat damb trenta sèt escolans mès matriculadi respècte ar an anterior, era shifra mès nauta de 2013 ençà, quan s’accentuèc eth descens enes matricules que patie ja de 2010 estant.
Era Escòla Mairau “Era Cunhèra”, depenenta der Ajuntament de Vielha e Mijaran, a barrat er an 2016 damb ua bona noticia, en tot auer artenhut sies cents dètz escolans matriculadi ath long de tot er an. Ua shifra que supère en trenta sèt ara que se registrèc pendent er an 2015. Entà María Vergés, dusau Tinent d’Alcalde e còsso d’educacion, aguesta melhora ena matricula “ei resultat, entre d’auti, des diuèrsi cambis qu’auem implantat ena metodologia d’ensenhament e en foncionament deth centre, atau coma era adequacion des tarifes as besonhs des familhes”. En aguest sens cau díder qu’era Escòla Mairau “Era Cunhèra” a implantat a compdar deth cors 2015-2016 un cambi ena metodologia en tot passar a trabalhar per projèctes.
Vergés tanben a destacat era fòrta implicacion qu’er Ajuntament de Vielha e Mijaran procure auer damb eth foncionament deth centre e ei per aquerò que s’amien a tèrme amassades quinzeaus damb eth professorat entà coordinar es accions a desvolopar, “e ei tanben, sense cap tipe de dubte, gràcies a tot eth professorat deth centre que s’an artenhut aguesti resultats” higie era còsso, “sense desbrembar era implicacion e bona predisposicion des familhes damb era Escòla, hèt que facilite fòrça qu’es causes foncionen”. “Era Cunhèra” acuelh a escolans des sies mesi enquiàs tres ans, e en aguesti moments a dubèrtes cinc linhes educatives, de P0, P1 e P2.
11/01/2017