Notícies Veir istoric
Er Ajuntament de Vielha e Mijaran edite un nau mapa toristic de tot eth municipi
Eth nau mapa a part d’includir eth tradicionau mapa damb toti es carrèrs dera poblacion de Vielha includís un mapa de tot eth municipi en quau se mèt en valor eth rèste de poblacions e es sòns principaus punts d’interès toristic.
Enes pròplèus dies se poderàn trapar enes burèus de torisme e des empreses toristiques dera Val d’Aran es naui mapes des carrèrs qu’er Ajuntament de Vielha e Mijaran a editat entà dar a conèisher a toti es toristes que mos vien a visitar pendent tot er an es punts més importants e representatius deth municipi. Era edicion s’a hèt a tot color en format de pòcha e plegable, en un costat se pòt trapar tota era informacion de Vielha damb es lòcs més importants dera población, coma er Ajuntament, Corrèus, Burèus de Torisme, Glèises, Musèus, Bibliotèqua, Palai d’Espòrts e Palai de Gèu entre d’auti, ath delà des principaus carrèrs e avengudes.
Per aute costat deth mapa s’a representat eth conjunt des poblacions de Vielha e Mijaran damb es sues principaus atraccions e es punts de interés naturau, ath delà des zònes de montanha més representatives entà realizar excorsions, zònes de picnic e guardadèrs. Era foncion deth nau mapa ei cumplir er objectiu de refortinhar era imatge toristica deth municipi jos ua unica mèrca e aufrir as nòsti visitants era aufèrta toristica qu’aufrís eth nòste destin pendent era sua estancia.