Notícies Veir istoric
Vielha aufrís dus concèrts gratuïts pendent es hèstes de Nadau damb figures de prumèra linha
Eth 27 de deseme Vielha acuelherà ara Orquèstra Julià Carbonell e eth 29 serà eth torn dera XVIII edicion deth Festivau d’Òrgues de Ponent e deth Pirenèu, damb Marta Infante, mezzo soprano, e Pablo Márquez, organista
Er Ajuntament de Vielha e Mijaran a organizat tàs pròplèu dies dus concèrts tà completar era ofèrta culturau d’aguesti dies de Nadau.
Eth prumèr concèrt serà a cargue dera Orquèstra Julià Carbonell des Tèrres de Lleida, orquèstra titulara der Auditòri Enric Granados e deth Teatre La Llotja, de Lleida, qu’actuarà eth dimars 27 de deseme, tàs 19’00h, ena glèisa de Mijaran jos era direccion d’Alfons Reverté. Aguest concèrt, qu’ei gratuït, s’organize gràcies ara collaboracion damb er Institut d’Estudis Ilerdencs, qu’a coma objectiu eth d’apropar era musica a tota era ciutadania.
Eth programa dera OJC entath dia 27 pòrte per nòm “Còrdes de Cine” e ei inspirat en diuèrses bandes sonores de pellicules coma Psicòsi, Era Lista d’Schindler…e compdarà damb eth violinista Joan Espina.
Eth dusau concèrt se celebrarà eth dijaus 29 de deseme, tàs 20’15h ena glèisa de Sant Miquèu de Vielha, e ei enmarcat laguens deth XVIII Festivau de Musica de Tardor Òrgues de Ponent i del Pirinèu. En aguesta edicion presenten ara mezzo soprano Marta Infante e er organista Pablo Márquez.
Infante a cantat damb es principaus orquèstres deth país coma era Simfonica de Barcelona e Nacionau de Catalunya, RTVE, Nacionau d’España, Orquestra dera Comunitat de Madrid, Real Filarmonia de Galícia, Simfonica de Bilbao, Filarmònica de Málaga, e tanben damb era Orquèstra Nacionau d’El Salvador, orquèstra Gulbenkian de Lisboa...Pera sua part, Pablo Márquez ei er organista dera catedrau de Valéncia e dera Coral Catedralícia. A aufrit nombrosi concèrts per tota Europa e collabòre coma solista e integrant d’agrupacions cambristiques e orquestraus en España, Portugau, França, Itàlia, Alemanha e Holanda.
21/12/2016