Notícies Veir istoric
Era Bibliotèca Generau de Vielha celèbre eth sòn quinzau aniversari
Entà hestejar-lo era Bibliotèca e er Ajuntament de Vielha e Mijaran an organizat ua setmana d’activitats culturaus
Eth pròplèu 25 de noveme se celèbren 15 ans dera inauguracion dera Bibliotèca Generau de Vielha, gestionada per Ajuntament de Vielha e Mijaran e que compde damb eth supòrt deth Conselh Generau d’Aran. Segontes declaraue Ana García, directora deth centre: “era Bibliotèca pòrte un ritme de trabalh fòrça intens e s’a convertit damb eth temps en un centre de referéncia en tot Aran, autant tara consulta generica coma damb es centres escolars que mos visiten periodicament”. Aguest equipament s’a consolidat pendent aguesti quinze ans, en tot aufrir un servici bibliotecari fòrça ampli e un gran tipe d’activitats entà adults e mainatges, relacionades damb es libres e eth foment dera lengua e era lectura.
“Des der Ajuntament de Vielha e Mijaran èm fòrça satisfèti dera trajectòria dera Bibliotèca Generau e deth trabalh des sòns professionaus. Eth nòste rèpte ei sajar d’apropar-la mès ara gent en tot aufrir activitats atractives e actuaus coma eth concors de microrelats en twitter, ath temps que servissen entà potenciar er aranés en carrèr” manifestaue Maria Vergés, còsso de cultura der Ajuntament. Deth deluns 21 enquiath diuendres 25 de noveme s’amiaran a tèrme diuèrses activitats tà celebrar aguest aniversari*, d’entre es que podem trobar ua lectura teatralizada a cargue deth grop “Era Cabana” de Les, un concèrt a cargue deth grup “Ribatònics” o era entrèga des prèmis deth 1èr Concors de microrelats per twitter.
16/11/2016