Notícies Veir istoric
Membres deth Ministèri de Miei Ambient arreconeishen qu’eth papèr des ajuntaments ei clau ena gestion des arrius
Ua polemica viua dempús des aiguats deth 18 de junh de 2013 ena Val d’Aran
Pendent eth seminari finau deth projècte europèu Sud’Eau 2 titolat ‘Gestión local sostenible y participativa del agua y de los ríos’, qu’a agut lòc aguesta setmana en Tafalla (Navarra), a reapareishut eth debat sus era gestion locau des arrius, a on membres deth Ministèri de Miei Ambient an arreconeishut qu’eth papèr des Ajuntaments ei clau en aguest encastre. Cau arrebrembar qu’aguesta polemica a guanhat pes ena societat aranesa dempús des aiguats deth 18 de junh de 2013.
Dempús dera ponéncia de Víctor Arqued, sosdirector de planificacion deth Ministèri de Miei Ambient, eth dimars 4 de noveme, er alcalde de Vielha e Mijaran, Alex Moga, li a preguntat sus era participacion ena gestion des arrius per part des entitats locaus, ath que Arqued a arresponut: “Normauments es Plans de Gestion deth Risc d’Inondacion favorissen er entorn naturau. Ei evident qu’era administracion locau a de participar en eri. Calerà parlar damb era Confederacion Idrografica der Ebre entà tractar er ahèr”.
Eth dimèrcles 5 de noveme, a participat en seminari eth membre dera sosdireccion generau de gestion integrada deth domeni public idraulic deth Ministèri de Miei Ambient, Francisco Javier Sánchez, a qui César Pérez, director deth servici der aigua deth Govèrn de Navarra, li a arrebrembat era qüestion de Moga. Sánchez a arresponut: “Es Ajuntaments son era pèira mès importanta en aguest sentit. Mès soent mos cau complir damb terminis dera Comission Europèa e non podem consultar bères decisions”.
Sus es naui Plans de Gestion deth Risc d’Inondacion, Sánchez a apuntat que “en deseme de 2015 mos cau presentar-les ara Comission Europèa e a compdar de deseme de 2014, les meteram en consulta publica. Ara madeish escriuem es borrolhons. Entà conéisher e debàter es demandes e aportacions des entitats locaus, coma es Ajuntaments, realizaram ua jornada participativa per Comunitat Autonòma e conca idrografica”. Fin finau, Sánchez a concludit: “Es inondacions contunharàn en tot succedir, mès trabalham entà implantar es estruments qu’ajuden a minimizar es sòns damatges”.
06/11/2014