Notícies Veir istoric
Vielha gaudic dera I North Face Enduro Race aguesta dimenjada
106 corredors se dèren cita ena prumèra Carrèra d’ Enduro populara damb biciclèta pes bòsqui de Vielha
Aguesta dimenjada, deth 15 ath 16 d’octubre, Vielha acuelhèc era North Face Enduro Race, carrera de Rally de descens damb biciclètes d’enduro, organizada per Aran Bike Parks e damb era collaboracion der Ajuntament de Vielha e Mijaran. Eth dissabte 15 se realizèc eth reconeishement deth circuit e pera tarde ua pròva cronometrada entà establir er orde de gessuda dera carrèra deth dimenje, en un tram secrèt entà es participants peth bòsc dera Tuca. Eth dimenje siguec eth dia dera carrèra North Face Enduro Race, que comencèc damb ua amassada entàs 8.00 ores. Cada trenta segons comencèren a gésser es competidors, que gaudiren der entorn dera cap lòc aranesa e qu’aueren de realizar tres trams especiaus de baishada en un totau de 36 quilòmetres de circuit. Eth liurament de prèmis e eth dinar de toti es participants se realizèc en finalizar era competicion ath delà d’ua pròva especiau en Pump Track de Vielha. En totau sigueren 106 participants, vengudi majoritàriament deth País Vasc, França e Catalunya, que gaudiresn deth circuit especiauments premanit entath eveniment, atau coma d’ues condicions meteorologiques perfèctes.
Segontes es declaracions d’Alberto López, còsso d’Espòrts der Ajuntament de Vielha e Mijaran, "aguest eveniment que s’a realizat en Vielha, contunhe era linha der actuau Consistòri, qu’apòste claraments per naui reclams toristics damb granes possibilitats de futur, coma ei eth producte toristic dera bicicleta de montanha". Ath delà a declarat tanben, "qu’ei ua oferta toristica que se pòt trebalhar fòrça pendent grana part der an, en tot beneficiar economicaments as comerciants deth municipi" Entà David López, organizador der eveniment "arregraïm fòrça era collaboracion der Ajuntament de Vielha e Mijaran entara celebracion d’aguest eveniment que s’a svolopat per prumèr viatge e a estat tot un luxe poder condar damb grani competidors d’aguesta modalitat"