Notícies Veir istoric
Er Ajuntament de Vielha e Mijaran obligat a assumir eth deute deth Palai de Gèu
Eth Consistòri se ve forçat a asumir dus credits bancaris per un impòrt totau de 462.000E que sigueren signats per VIGESA en 2008 e 2011
Coma ja auem anat informant, enes darrèri mesi s’amiat a tèrme era disolucion dera societat Vielha Gestion S.A. (VIGESA) per imperatiu legau, pr’amor que se trapaue en ua greu situacion de desequilibri financèr.
Aguesta societat siguec creada en an 1994 entà gestionar eth Palai de Gèu, e era participacion majoritària ei propietat der Ajuntament de Vielha e Mijaran.
Dempús d’aguesta disolucion, er Ajuntament de Vielha e Mijaran s’a de subrogar as dus crèdits bancaris qu’aguesta societat auie suscrits.
Aguesti crèdits se signèren damb eth Banc Mare Nostrum e eth Banc Santander, eth prumèr damb un deute pendent de 251.000E e eth dusau damb un impòrt de 211.000E.
Atau donques e entà cumplir damb er article 32 dera "Ley Orgánica 2/2015 de Estabilidad Presupuestaria y Financiera", er Ajuntament a d’amortizar aguest deute pendent er exercici condable damb es sòs deth remanent de tesorería, ei a díder, damb aqueri sòs qu’er Ajuntament a pogut estauviar deth pressupòst.
D’aguesta forma, eth Consistòri non poderà pas utilizar aguesti recorsi entà d’autes finalitats e interesi municipaus coma podèn èster òbres, manteniments o accions enes diferenti ambits gestionats.
"Aguesta ei i auta dificultat que cau híger ara gestión deth Palai de Gèu" declaraue eth baile de Vielha e Mijaran, Juan Antonio Serrano.
"Estam trebalhant intensaments, amassa damb es responsables deth Palai e er equip tecnic e juridic entà trapar era melhor solucion entara gestión d’aguest equipament, hèm conscients dera importància sociau que a, non sonque entath nòste municipi, senon tanben entà tot Aran".
Enes pròplèus setmanes, atau e coma s’anoncièc per part der Ajuntament, se licitarà era gestión deth Palai de Gèu. "Demoram qu e i age empreses interessades que se presenten ath concors entà obtier era gestion d’aguest equipament" a declarat Serrano".
30/09/2016