Notícies Veir istoric
Celebracion deth Plen Municipau der Ajuntament de Vielha e Mijaran
En quau s’a aprovat era modificacion de credit deth Pressupòst, es Hèstes Locaus entath 2017 e era naua nòrma de foncionament e usatge des sales d’exposicions.
Aué s’a celebrat, ena Sala de Plens der Ajuntament de Vielha e Mijaran, era Session Ordinària dera Corporacion, a on s’an tractat diferenti punts qu’èren d’importància. Un des punts mès importants ère era 3ª Modificacion de credit deth Pressupòst der exercici 2016, a on s’an modificat 45.400 € deth Pressupòst iniciau, destinadi a ua ajuda entath AMPA dera Escòla Garona, per impòrt de 2.500 € entà era crompa d’ordenadors tàs estudis e 42.900 € entara contractacion d’un reforç estivau dera brigada municipau de neteja e tara contractacion d’ua empresa extèrna entara mantenença dera jardineria e era neteja des carrèrs de toti es municipis d’aguest ajuntament. A estat aprovat per unanimitat. Es auti dus punts modificadi, presentadi per María Vèrges, còssa de cultura, an estat era Aprobacion des Hèstes Locaus deth Municipi entar An 2017 qu’a exposat modificar ua des dates de hèsta locaus, era deth 8 d’octobre, Hèira de Vielha, qu’er an que ven serà dimenge, peth 28 de hereuèr, entà hèr coïncidir era hèsta deth Collègi Garona damb es familhes. A demorat aprovada era modificacion dera data damb 8 vòts en favor e 5 en contra. E tamben era Aprobacion iniciau dera nòrma de foncionament e usatge des sales d’exposicions a on era sala d’exposicions de Vielha, passarà a èster exclusiuaments entà usatge d’exposicions d’interès public sense ànim de lucre e era sala deth Centre Associatiu de Vielha tàs exposicions privades. Damb 8 vòts en favor e 5 abstencions.
Era Aprobacion dera acta dera session anteriora, Dar compdes des Decrèts deth Baile, Aprobacion des Compdes Generaus der An 2015 e Dar informacion sus era execucion deth Pressupòst e dera Tresoreria a data de 30 junh 2016 an estat aprovadi per unanimitat des assistents.