Notícies Veir istoric
Vielha se premanís entà acuélher aguesta dimenjada eth IX Torneg 30 ores de Fotbòl Sala “Vila de Vielha”
Mès de 200 participants arribaran pendent tota era dimenjada
Es dies 18 e 19 de junh, eth Pabelhon d’Espòrts de Vielha acuelherà eth IX Torneg 30 ores de Fotbòl Sala “Vila de Vielha” organizat pera “Associacion Esportiua Fotbòl d’Aran (AEFA)” e damb era collaboracion der Ajuntament de Vielha de Mijaran. Mès de 200 participants, repartidi en 16 equips, dera Val de Aran e de diuèrsi municipis catalans (Sitges, Mollerusa, Pont de Suert, Llèida e Solsona, entre d’auti), se daràn cita a compdar deth dissabte 18 tàs 12:30 ores entà participar en aguest Torneg, que cada an some en prestigi entre es ligues de fotbòl sala amateur català. Entà Alberto López, Còsso d’Espòrts “ei un orgulh entar Ajuntament de Vielha e Mijaran collaborar damb aguest torneg, que melhore an darrèr an, e qu’apòrte tant entara poblacion, damb un gran nombre d’equips que vien de dehòra damb fòrça acompanhants, e que da ath madeish temps ua grana publicitat entath municipi”. Es guanhadors deth Torneg, ath delà deth trofèu an un prèmi de 1.500 èuros en metallic e era possibilitat de jogar, en seteme, contra ua equipa dera Liga Professionau Nacionau de Fotbòl Sala, que hè era sua pretemporada en Vielha.
Enguan, s’a organizat un torneg parallel infantil, entà joens neishudi entre 2001 e 2004, cridat “Objectiu 30 ores” e que disputaràn era sua finau eth dimenge 19, tàs 17:40 ores, abans dera finau deth Torneg 30 ores. Er arbitratge deth Torneg ei a cargue de dètz professionaus dera Federacion Catalana de Fotbòl e toti es partits se disputaràn en Pabelhon d’Espòrts de Vielha. Era grana fin se disputarà eth dimenge 19 as 18:15 ores, a on era equipa “Joga Polit” de Badalona, demore ratificar eth títol der an darrèr. Ath delà des prèmis entath prumèr e dusau classificat, se liuraràn prèmis especiaus ath Melhor Jogador, Portièr, Maxim Golejador e ara Deportivitat.