Notícies Veir istoric
Vielha celèbre era sua tradicionau romeria de Santa Quitèria
Coma nauetat s’a organizat un minjar popular
Deman, dimenge 22 de mai, se celebrarà un an més era Hèsta de Santa Quitèria ena Boca Sud deth Tunèl. Segontes era tradicion, Santa Quitèria neishec en sègle IV en Portugau e siguec assassinada en França, en tot èster de peregrinacion en Roma. Era devocion per aguesta Santa s’esten per tot eth Pirenèu e eth sud de França, a on s’organizen hèstes e romeries en sòn aunor pendent aguest dia. Entà commemorar aguesta hestivitat, er Ajuntament de Vielha e Mijaran organize annauments, des deth sègle X, ua amassada ena boca sud deth tunèl de Vielha. Era data coïncidís, normauments, damb era arribada deth bon temps. Tàs 10.30 ores, eth Ajuntament de Vielha e Mijaran aufrirà a toti es assistents un esdejoar popular gratuït. Tàs 12.00 començarà era missa en aunor a Santa Quitèria, seguida dera benediccion deth Tèrme e deth repart dera Caritat. Tot amenizat pera musica deth grop que mos acompanharà enquiara ora de minjar.
Coma nauetat e entà reviuer aguesta tradicionau romeria, er Ajuntament de Vielha e Mijaran a organizat un minjar popular, daurida a toti, damb un menu consistent en amanida, fideuà e pòstre. Eth prètz des tiquets ei de 15€ entàs adults e de 10€ entàs mainatges menors de 12 ans. Se pòden crompar en Ajuntament de Vielha e Mijaran e en madeish lòc e momento deth minjar. Pera tarde, tàs 16:00 ores i aurà balh de tarde en madeish refugi. Les arrebrembam qu’era enterpresa Alsa aufrís transpòrt gratuït d’autobús entà viatjar ara boca sud deth tunèl damb gessudes des dera parada de Vielha tas 10.00 e tas 11.00 e entà tornar, i aurà autobusi des dera parada deth refugi tas 18.00 e tas 19.00 ores.
20/05/2016