Notícies Veir istoric
Aprovat eth projècte amassa de Vielha e Mijaran, Benasque e Luchon
Jos eth nòm “Reino del Aneto” siguec presentat ara convocacion d’ajudes des Programes de Cooperacion Territoriau INTERREG V-A ESPANHA-FRANÇA-ANDÒRRA (POCTEFA 2014-2020)
Eth darrèr diuendres 13 de mai se hège publica era concession dera ajuda entà poder amiar a tèrme eth projècte comun “Reino del Aneto”, un producte toristic d’explotacion enes tres vals, damb un impòrt de 702.000€. Des 122 projèctes presentadi unicaments 58 an estat aprovadi, entre eri aguest. Es ajuntaments de Vielha e Mijaran, Benasque e Luchon s’amasseren en 2015 entà presentar aguest projècte conjunt laguens eth marc deth Programa Operatiu Territoriau Espanha-França-Andòrra (POCTEFA) 2014-2020,. Aguest programa represente un supòrt financer comunitari destinat a reforçar era integracion economica e sociau d’aguesti territòris. Eth principau objectiu des tres municipis ei realizar accions de desvolopament sostenible a traués des sòns recorsi naturaus, païsatgistics e culturaus, en tot profitar era demanda toristica. Pendent es pròplèus tres ans, Vielha, Luchon e Benasque seràn connectadi a trauès d’accions culturaus, toristiques e sociaus.
Entà María Verges, dusaua Tinent de Baile “aguest ei un projècte realista que, ath delà de connectar es tres vals, les potenciarà economica, sociau e culturauments d’ua manèra sostenible”, ath delà soslinhèc “entre d’auti productes que presentaram, cream ua rota entre es tres vals entà senderistes e era nòsta intencion ei era de potenciar era montanha coma element de dinamizacion a toti es nivèus”. Ua des prumères accions deth projècti “Reino del Aneto”, serà era creacion d’ua aplicacion toristica entà mobils, damb tota era informacion des servicis, establiments e rotes.