Notícies Veir istoric
Er Ajuntament de Vielha e Mijaran garantís era contunhitat deth Complèxe Esportiu “Palai de Gèu” damb era modificacion de crèdit deth pressupòst.
Eth Plen der Ajuntament de Vielha, celebrat aué, a aprovat damb 8 vòts en favor e 5 abstencions era dusaua modificacion de crèdit deth Pressupòst der exercici der an 2016 que ei de un impòrt totau de 1.342.582 èuros. Dita modificacion deth pressupòst assegure era contunhitat dera gestion deth Palai de Gèu, ath delà tanben de mantier es servicis municipaus as quaus s’auie comprometut er actuau govèrn. Entara gestion deth complèxe esportiu, eth consistòri a previst dus escenaris possibles, per ua part e prioritari, a trauès dera licitacion d’ua concession d’explotacion per part d’ua enterpresa privada e coma dusaua era gestion dirècta per part der Ajuntament de Vielha e Mijaran. Segontes eth baile de Vielha D. Juan Antonio Serrano aguesta circonstància sus era obligacion de hèr-se càrrec deth rescat dera enterpresa explotadora deth servici deth Palai de Gèu, limite era capacitat d’accion e inversion qu’auie prevista era equipa de govèrn entath exercici der an 2016 e obligue a auer prevista ua partida damb un impòrt de 517.000 èuros que garantisque era contunhitat dera activitat en complèxe esportiu.
Tanben cap destacar er increment qu’er Ajuntament dedicarà ara mantenença e apariament des vials publics (vorera, empeirats, paviments…) e eth mobiliari urban de Vielha e de totes es poblacions deth municipi damb ua partida de 425.000 èuros, e que s’executarà dempús der estudi e analisi des espais afectadi. Era auta grana partida, qu’ei apròp des 200.000 èuros, anarà destinada ara licitacion d’ua nterpresa privada entath servici de neteja des carrèrs e mantenença des jardins publics de tot eth municipi de Vielha e Mijaran e es sues pedanies. .