Notícies Veir istoric
Er Ajuntament de Vielha e Mijaran e eth Grèmi d’Ostalaria Val d’Aran an negociat es naui oraris de terrasses
Ei previst amiar a terme aguesta modificacion d’oraris aguest ostiu .
Er Ajuntament de Vielha e Mijaran amassa damb eth Grèmi d’Ostalaria Val d’Aran an arrivat a un acòrd entà fixar es naui oraris d’emplec des terrasses des bars e des restaurants de Vielha, aguest acòrd aurà d’èster aprovat en pròplèu Plen der Ajuntament eth pròplèu 11 de mai. En aguesta negociacion, ena quau an trabalhat amassa es dues entitats, se modificarà era anteriora ordenança, de hè 3 ans, unica e exclusiuaments enes oraris, donques qu’ère era mesura mès urgenta qu’ambdues parts contemplauen. Segontes mots de Juan Antonio Serrano, baile de Vielha e Mijaran, “se sage damb aguest acòrd arribar a un benefici entà totes es parts, vesins, visitants e es pròpris ostalèrs, donques que daràn un major descans nocturn vesiau e més seguretat as pedanhs, e era intencion ei compaginar damb era activitat economica e toristica”.
Eth nau orari serà tostemp enquias 00:00 ores, a excepcion dera sason d’ostiu, deth 21 de junh enquiath 21 de seteme, e es diuendres, dissabtes e dies abantes de dia festiu, e eth rèste der an serà enquiàs 00:30 ores. Eth temps entà recuelhuda de dites terrasses serà de 15 menutes. Ath delà des oraris, eth consistòri e eth grèmi trabalhen en modificar d’auti punts dera anteriora ordenança entà hèr mès equitatiu er emplec des terrasses de toti es bars e restaurants deth municipi, coma son es distàncies sobre era via publica, es mètres quarrats e es tarifes que s’apliquen actuauments. Toti aguesti punts se tractaràn dempús dera campanha estivau.