Notícies Veir istoric
Er Snowfest Val d’Aran 2014 arribe en Vielha damb musica e activitats
Eth 28 e 29 se noveme
Es pròplèus diuendres 28 e dissabte 29 de noveme arribe en Vielha er Snowfest Val d’Aran 2014, dus dies plens d’activitats entà dar-li era benvenguda ara nhèu e ar heired ena Val d’Aran, en çò que se demore, s’eth temps complís damb es previsions, que sigue era dimenjada de dubertura dera estacion d’esquí de Baqueira-Beret.
Eth diuendres 28 se realizarà eth Live Music en Passeg dera Libertat de Vielha, per iniciatiua dera Associacion de Comerçants de Vielha. Er eveniment, que començarà tàs 19 ores, a previst un balh Snowdance dera Escòla Tchaikovsky; un concèrt trio damb Tonia Richardson (veu), Abel Boquera (teclat) e Sol Homar (percussion); e era rota SnowTapa, que tanben s’harà eth dissabte, damb prètzi especiaus, en diuèrsi bars de Vielha.
Eth dissabte 29 peth maitin, s’i a nhèu enes pistes, diuèrses mèrques s’aufriràn entà hèr tèst de materiau en Baqueira tàs 10.30 ores. Eth dimenge tanben se repetirà s’era nhèu ac permet.
Era tarde deth dissabte, de 16 a 21 ores, eth Palai d’Espòrts de Vielha acuelh eth ‘Salón de Ocio en la Nieve’, ua hèira a on participen mèrques de materiau d’esquí, clubs d’espòrts d’iuèrn e Era Escòla que complís 50 ans e harà ua exibicion des vestits d’esquí deth darrèr miei sègle. Tàs 18.30 ores serà eth torn des parlaments e dempús se reprodusirà era pellicula des 50 ans de Baqueira-Beret.
Era net deth dissabte, de 23 a 3 ores, era sala poliesportiua de Vielha serà er scenari d’ua naua parada deth ‘Tour 40’, damb es presentadors de radioformules des 40 Principales: Ernest Codina, Roger Carandell e Adrià Ortega.
20/11/2014