Notícies Veir istoric
Prumèra reünion dera Associacion de Bailes Aranesi en Vielha d’aguesta legislatura.
Era amassada se celebrèc en Ajuntament de Vielha e Mijaran
Ager s’amassèren ena Sala de Plens der Ajuntament de Vielha e Mijaran, ua grana part des bailes dera Val d’Aran, membres dera “Associacion de Bailes dera Val d’Aran, que siguec creada era darrèra legislatura entà aunar esfòrci e acordar per consens, accions en favor de toti es municipis aranesi. Era amassada, presidida per Juan Antonio Serrano, que coma baile de Vielha e Mijaran presidís aguesta Associacion, auie coma objectiu tractar diuèrsi tèmes que preocupen e afècten de forma comuna a toti es municipis. Ath madeish temps, tanben assistic Francés Boya, deputat provinciau per Aran. Era reünion auec coma prumèr punt der orde deth dia, eth quau mès procupe as bailes, eth deute pendent qu’a era Generalitat de Catalonha damb es consistòris aranesi, que some quasi 2.000.000E des der an 2012. En cas concrèt de Vielha e Mijaran, eth deute qu’era Generalitat a ei de mès de 600.000E. Toti es assistents acordèren hèr arribar ua reclamacion conjunta damb es impòrts qu’era Generalitat a pendent de cada Ajuntament e reclamar que se mèrquen uns terminis de pagament.
Auti punts deth dia sigueren era caça controlada e es mòtos de montanha, tèmes fòrça discutidi e que preocupen as bailes e qu’aueren coma acòrd finau de toti impulsar era creacion d’un reglament d’emplec des montanhes e boni metòdes. Ath delà, en cas dera caça controlada, se sollicitarà ua reünion extraordinària damb era Societat de Caça e Pesca dera Val d’Aran, organisme que la reglamente, entà arribar a un acòrd conjunt. En aguest punt tanben se tractèc era extracción de biomasa des bòsqui e s’acordèc conéisher quin serà eth futur dera husta des bòsqui de cada municipi e saber a on se plaçaràn, e tnaben tà quin tipe de caudères de cremat s’utilizaran. Entà finalizar, se tractèc era reintroduccion deth Gatilop Boreal en Naut Aran, un punt qu’ei en programa qu’a eth Ministèri de Miei ambient, aguest projècte pilòt, se tracte en punts generaus d’introdusir tres femelhes e un mascle d’aguesta espècia, en dues zònes deth Naut Aran. Dehòra der Orde deth Dia, César Ruiz, baile deth Naut Aran, presentèc un projècte entà implantar un hilat de WI-FI en tota era Val d’Aran. Eth punt demorèc pendent d’aprobacion, en demora des pressupòsti finaus e viabilitat deth sistèma. En aguest sens s’exposèc as assistents, que des dera Deputacion de Lleida se hè liurament ath Conselh Generau d’Aran, annuaments, de mès de 200.000E entà ajudes as consistòris aranesi e qu’an d’informar-se en dit organisme de com poder sollicitar-les entàs sòns Ajuntaments. Eth baile de Vielha e Mijaran mostraue era sua satisfaccion per confirmar er interès des bailes aranesi en mantier e dinamizar aguesta associacion ath madeish temps qu’insistie en dotar-la de mecanismes e contenguts qu’ajuden a qu’es nòsti municipis, es mès desbrembadi ena gestion publica, poguen èster escotadi e atengudi en igualtat de condicions”.