Notícies Veir istoric
Visita dera Delegada deth Govern a l’Alt Pirineu i Aran en Ajuntament de Vielha e Mijaran
Pendent era reünion s’an tractat tèmes generics dera Generalitat damb er Ajuntament
Vielha, 18 d’abriu de 2016. Era Delegada deth Govern a l’Alt Pirineu i Aran, María Rosa Amorós i Capdevila, a visitat e s’a amassat, per prumèr còp des de que prenec eth cargue, damb Juan Antonio Serrano, baile de Vielha e Mijaran. Pendent era reünion s’an tractat tèmes generics, de Torisme, Sanitat, Infrastructures, Espòrts e Ahèrs Sociaus, dera relacion e desvolopament de politiques entre era Generalitat de Catalonha e er Ajuntament de Vielha e Mijaran. En aguest sentit, eth baile a arrebrembat ara delegada era delicada situacion que trauessen es ajuntaments pr’amor eth deute qu’era Generalitat a damb eri, qu’en cas de Vielha e Mijaran ei de 621.644€, e li a demanat que collabòre damb er Ajuntament entà solucionar aguest grèu problèma, que limite notablaments era activitat e gestion en municipi atau coma era qualitat des servicis que prèste eth consistòri ara ciutadania. Tanben, Juan Antonio Serrano, a informat dera dificila situacion que passe actuauments eth Palai de Gèu de Vielha.
Era Delegada deth Govern a estat, en tot moment, fòrça interessada en conéisher es relacions entre es dues institucions e qu’entà eth consistòri municipau son de nauta importància. Per part d’eth Ajuntament, Juan Antonio Serrano a profitat entà informar-li qu’er Ajuntament de Vielha ei a plea disposicion entà tractar quin tèma restacat que sigue de collaboracion damb era Val d’Aran, e especiuaments de Vielha e Mijaran, e era Generalitat de Catalonha.
18/04/2016