Notícies Veir istoric
Juan Antonio Serrano estudie era possibilitat de crear era figura deth Síndic de Greuges de Vielha e Mijaran
Dempús dera amassada damb eth Fórum de Síndics de Greuges de Catalonha
Juan Antonio Serrano, baile de Vielha e Mijaran e María Verges, còsso d’Educacion, Cultura e Comunicacion, Accion Sociau e Ciutadania, s’amassèren damb es representants deth Fórum de Síndics de Greuges Locals de Catalonha, Josep Giné, Síndic de Greuges de Lleida, Angel Rubio, Síndic de Greuges dera Seu d’Urgell, e MªGloria Valeri, Sindica de Greuges de Vilafranca del Penedés.
Er objectiu dera amassada siguec conéisher eth sòn foncionament e servici, donques qu’er Ajuntament de Vielha e Mijaran a era intencion de crear era figura d’un Síndic de Greuges entà Vielha e Mijaran e poder dar un servici mès ara ciutadania damb relacion damb er ajuntament. Ath finalizar era amassada, Juan Antonio Serrano declarèc “èm fòrça contenti damb era visita e avaloraram era possibilitat de crear un Síndic de Greuges en Vielha a miei termini”. Eth Síndic de Greuges de Catalonha ei ua des institucions dera Generalitat de Catalonha. Es sues foncions son definides enes articles 78 e 79 der Estatut d’Autonomia de Catalonha. Era sua mission ei garantir eth dret de totes es persones a ua bona administracion governamentau. Eth Síndic, a d’atier es planhs des persones que se tròben desamparades deuant era accion o era fauta d’accion des administracions. Era figura deth Síndic a precedents istòrics enes Assemblees de Patz dera S. XI, atau coma enes reunions de greuges dera Edat Mieja. Auem de rebrembar qu’eth Síndic de Greuges s’aucupe de cuedar entà que se respècten es drets des persones. Drets qu’afècten a desparièrs collectius e àmbits d’acutiacion, e que definissen era nòsta societat actuau. Es drets sociaus qu’afècten principauments as collectius mès vulnerables, d’auti drets sociaus e economics, coma es relacionadi damb era sanitat, era educacion, er abitatge, eth miei ambient o er accès ath trabalh, es drets civius e politics, qu’afècten ahèrs coma era seguretat ciutadana, er exercici dera democracia, era participacion e era politica lingüistica e es drets de solidaritat e eth dret a ua bona administracion barren eth blòc principau de planhs e demandes que tramite era institucion.
29/03/2016