Notícies Veir istoric
Rècord d’activitats ena Bibliotèca Generau de Vielha
Pendent es darrèri mesi s’an amiat a tèrme nombrosi actes dirigidi a public infantil enquia majors de 65 ans
Era Bibliotèca Generau de Vielha a generat enes darrèri mesi un elevat nombre d’activitats orientades a tot tipe de public. As que se realizen de forma abituau pendent eth cors escolar, coma son es tres clubs de lectura des 7 enquiàs 10 ans, e tanben un grop de 8 ans, i cau híger es sessions deth club de lectura en occitan e deth d’adults, e quinzenauments se hè un talhèr d’escritura creativa entara mainadèra.
Enguan, pendent eth prumèr trimesadèr der an a realizat visites especializades ath torn de diferents estils musicaus (pòp e ròck), e dera dansa Bollywood, atau coma ath torns des abituds saludables o deth còs uman damb diuèrses escòles d’Aran.
Entara gent mès grana, e en collaboracion damb era Fundació Pere Tarrès, s’an aufrit dues sessions gratuites de formacion en Smartphones.
E entà hestejar eth Dia Mondiau dera Poesia, eth 21 de març, e en collaboracion damb eth Musèu dera Val d’Aran, er Archiu Generau d’Aran, er Institut d’Aran, era Bibliotèca de Naut Aran e era Escòla Musicau Val d’Aran, s’a coorganizat eth recitau de poesia “Era poesia en temps des ‘Ordinaciones’”, en motiu deth 400 aniversari dera promulgacion des ‘Ordinaciones’ de Juan Francisco de Gracia -un document qu’actualize e compile era administracion aranesa en 1616- damb era lectura de poesia d’autors occitans d’aqueth temps: Pèire Godolin, Andrèu du Pré, Bertran Larada, Guilhèm Ader, Joan Guiraud d’Astròs e tanben d’autors catalans: el Rector de Vallfogona, e castelhans: Sor Juana Inés de la Cruz, Francisco de Quevedo e Eugenio Gerardo Lobo.
Des der Ajuntament de Vielha e Mijaran se valòre molt positivament aguesta nauta activitat, qu’ajude a apropar ara ciutadania ad aguest equipament.