Notícies Veir istoric
Vielha e Mijaran demane eth supòrt dera Generalitat e der Estat entà lutar contra es desigualtats
Eth plen der Ajuntament a aprovat aué dues mocions tà reclamar qu’andues administracions garantisquen qu’es municipis poguen complir damb era defensa des drets dera ciutadania
Aguest maitin s’amiat a tèrme eth plen ordinari der Ajuntament de Vielha e Mijaran. En aguest plen s’an sosmetut a votacion dues mocions relacionades damb era qualitat ena prestacion de servicis e damb eth supòrt a collectius desfavoridi.
Atau donc, era prumèra mocion, prebotjada pera UGT, reclame er impuls d’ua prestacion especifica entà arturats majors de 55 ans (Garantia +55) pr’amor que, en tot tier en compde que “se tracte d’ua prestacion de besonh en temps que viuem, pr’amor qu’un 19,6% dera gent activa major de 55 ans se tròbe en caumantge”, segontes manifestaue Maria Vergés, còsso d’accion sociau. En aguest sens, Vergés tanben a explicat que, en referéncia ara dusau mocion aprovada, que demane ar Estat e ara Generalitat supòrt e recorsi tàs ajuntaments, entà que poguen balhar un servici just e de qualitat ath ciutadan “es ajuntaments èm ena prumèra linha d’atencion ath ciutadan e era luta contra es desigualtats comence enes nòsti consistòris. Es efèctes des retalhades e dera crisi mos an deishat sense recorsi imprescindibles entà atier as familhes e as sòns besonhs”.
Pendent eth plen s’a aprovat tanben er inici des procedements administratius de recuperacion des concession administratives de VIGESA, entara gestion deth Palai de Gèu e deth parcatge subterrani d’aguest.
En aguest plen, Javier Rivas, còsso de Ciutadans e actuaument tanben deputat en Parlament de Catalunya, a presentat era sua renóncia ath cargue, pr’amor de, segontes a manifestat, non auer duplicitat de cargues publics.
27/01/2016