Notícies Veir istoric
Er Ajuntament de Vielha e Mijaran iniciarà e promoirà era internacionalizacion deth cap-lòc dera Val d’Aran
Er Ajuntament de Vielha e Mijaran damb era collaboracion dera
Generalitat de Catalunya promoirà era internacionalizacion de Vielha
coma cap-lòc dera Val d’Aran. Eth consistòri aranés encargarà un estudi e
Plan d’Accion, que se redactarà es pròplèus setmanes entà amiar-lo a
tèrme enes ans que vien.
Es èishi iniciaus d’aguest projècte an d’èster era cultura (autogovèrn,
istòria entre d’auti), era lengua (a on er occitan, aranés a l’Aran ei
er unic lòc damb reconeishença oficiau), era politica (ua singularitat
que s’enfortirà damb era naua Lei d’Aran) e era economia (a compdar d’ua
vessant toristica e/o empresariau).
Eth pressupòst iniciau que contemple er estudi e eth Plan d’Accion ei de 20.000 €, que 13.000€ que provieràn deth Departament de Presidència dera Generalitat. Eth pressupòst estimat entà amiar a tèrme era totalitat dera fase iniciau d’aguesta internacionalizacion ei de 120.000 € e era temporalitat entara sua execucion, de quate ans (2014-2017).
Eth baile de Vielha e Mijaran, Àlex Moga a apuntat que “ei era ora d’explicar Vielha coma cap-lòc d’un País oficiauments arreconeishuda era sua singularitat e convertir-la en un cas unic en Euròpa. Ei eth moment de començar a exportar eth nòste exemple dera man e damb era complicitat de Catalonha”.
Per aute costat, eth 10 de deseme, eth Plen deth DIPLOCAT (Consorci de Diplomàcia Pública de Catalunya) a previst aprovar era incorporacion der Ajuntament de Vielha e Mijaran e deth Conselh Generau d’Aran coma membres de plen dret dera institucion.
Damb aguesta mesura, segontes Moga: “Analisaram totes es potencialitats que mos daurís eth DIPLOCAT entà definir damb eth Plan d’Accion ua estrategia entà plaçar Vielha coma cap-lòc d’un País e d’ua lengua e cultura millenària en Euròpa”.
En aguesta linha, eth baile aranés ja a mantengut es prumèrs contactes damb era naua Secretària Generau dera Euroregion, Mireia Canals, entà sométer era entrada de Vielha laguens dera plataforma transfronterièra internacionau que se configure damb era Euroregion definida es pròplèus mesi.
28/11/2014