Notícies Veir istoric
Er Ajuntament de Vielha Mijaran presente era sua programacion culturau pròpria “Vielha en scena”
Aguesta programacion s’amie a terme gràcies ara collaboracion damb associacion “Aran Teatre” e s’estree aguest dissabte 24 damb eth cicle de programacion tà public familhar
Er Ajuntament de Vielha Mijaran a presentat era sua pròpria programacion culturau “Vielha en scena”. Aguesta programacion ven gestionada a trauèrs dera associacion “Arte”, gestion que se regís per un convèni de collaboracion entre era associacion e eth madeish Ajuntament.
Segontes manifestaue era còsso de cultura deth consistòri, Maria Vergés: “Er objectiu d’aguesta programacion ei era d’aufrir ua ofèrta culturau de qualitat pendent tot er an entà apropar era activitat culturau ath municipi”. Atau madeish tanben higie que: “Vielha en scena” vò èster era mèrca d’identificacion dera cultura en municipi de Vielha Mijaran atau coma un espaci a on amassar tota era produccion culturau que se realize des der Ajuntament.”
Era programacion culturau “Vielha en scena” se desvoloparà a trauès dera associacion Aran Teatre, que dejà compde damb fòrça ans d’experiéncia e acreditacion en aguest tipe d’ahèrs e damb qui er Ajuntament a un convèni de collaboracion tad aguest prètzhèt. En aguest sens Maria Vergés remercaue que: “eth pressupòst d’aguesta programacion non resulte un subercòst entar ajuntament, se non que s’obten de partides dejà existentes en airau de cultura”.
“Vielha en scena” s’estree aguest dissabte 24 damb era prumèra actuacion deth cicle tà public familhar qu’amiarà a tèrme eth grup “Xip Xap”, damb era òbra “El conte de la lletra”, tàs 18’00 ores ena sala Era Audiovisuau de Vielha
21/10/2015