Notícies Veir istoric
Vielha Mijaran modifique diuèrses taxes fiscaus tà emparar es negòcis permanents deth municipi
Eth plen der Ajuntament de Vielha a aprovat aué era modificacion de diuèrses ordenances, entre es que se trapen era que hè referéncia as cambis de titularitat e d’activitat de negòcis e ara abilitacion d’abitatges entà usatge toristic.
Aguest maitin, eth plen der Ajuntament de Vielha Mijaran a portat a votacion era modificacion de quate ordenances fiscaus, damb er objectiu, segontes explicaue er equip de govèrn, d’ajudar as empreses existentes e que se mantien pendent tot er an e ad aqueres qu’an intencion de daurir de manèra indefinida. En aguest sentit, s’an modificat quauqui punts dera Ordenança Fiscau numèro 7, que regule era tramitacion d’activitats subjèctes a autorizacion, licéncia e comunicacion per çò que hè as negòcis damb cambi de titolaritat o d’activitat.
En aguesta madeisha ordenança tanben s’a modificat er apartat referent ara taxa tath tràmit administratiu d’abilitacion d’abitatges d’usatge toristic, en tot aumentar-ne er impòrt a 600€ tà, segontes a manifestat Juan Antonio Serrano, alcalde de Vielha Mijaran, “gravar era competéncia desleiau qu’aguesti abitatges hèn as lotjaments regladi deth municipi”. Aguest modicacion a estat aprovada damb es vòts favorables d’Unitat d’Aran e es abstencions de CDA e C’s.
Ua auta modificacion aprovada, en aguest cas damb eth vòt afirmatiu d’UA e C’s e eth vòt en contra de CDA, a estat era supression dera excempcion der IBI des immòbles destinadi a centres sanitaris e assistenciaus. En aguest sentit er alcalde Serrano afirmaue que “se torne ara madeisha situacion que i auie enquia 2011, ena qu’aguesti edificis tributauen er impòst de bens immòbles ath municipi”, e en aguesta linha manifestaue que “era lei sonque obligue ara excempcion der IBI des edificis de defensa nacionau e es centres educatius, e dera madeisha manèra qu’er Ajuntament abòne, per exemple, es taxes de lordères des edificis coma era escòla, o balhe es servicis de neteja de carrèrs, enlumenat, eca a toti es edificis publics, pensam qu’entre laguens dera normalitat administrativa qu’aguesti ath sòn temps, abònen er IBI ar Ajuntament”.
En aguest madeish plen s’a aprovat tanben, en aguest cas per unanimitat, ua mocion sus es refugiats que hugen dera guèrra e qu’enes darrères setmanes arriben en Euròpa.
24/09/2015