Notícies Veir istoric
Eth Palai de Gèu modifique era sua politica de prètzi entà qu’es abonats poguen gaudir de mès activitats e descompdes
Eth passat 14 de seteme eth Conselh d’Administracion de Vielha Gestion, SA aprovèc es tarifes dera sason esportiua 2015 – 2016. Juan Antonio Serrano, president dera societat, a assegurat que ‘es naui prètzi supausen ua congelacion des abonaments de caractèr generau e ua reduccion importanta des abonaments trimestraus e mensuaus’.
Juan Antonio Serrano tanben a volut subervier en er hèt que ‘es abonaments auràn un descompde deth 30 % enes corsi de natacion, patinatge sus gèu e karate e que, aguest descompde, s’agranirà enquiath 50 % enes activitats d’ostiu’.
En parallel ara aprobacion d’aguestes tarifes, se trabalhe entà qu’era auferta d’activitats dirigides se pogue incrementar entà qu’es usatgèrs deth Palai de Gèu, en tot pagar eth madeish, poguen auer accès a un ventalh d’opcions mès amples.
Era amassada deth Conselh d’Administracion tanben servic entà modificar es periòdes de vigéncia des promocions especiaus. En aguest sens, era de dus mesi e miei servirà entar ostiu, mès ne nèish ua de naua, era quatrimestrau, que, des d’un punt de vista temporau, coïncidirà damb era sason d’esquí, ei a díder, des der 1 de deseme enquiath 30 de març der an que ven.
Fin finau, Juan Antonio Serrano a volut destacar que tanben ’s’a redusit en un 30 % era quòta que s’aufrís as centres d’ensenhament entà impulsar corsets de natacion escolara entre era poblacion infantila’.
En encastre des accions que s’an amiat a tèrme pendent eth periòde de barrament des installacions deth Palai de Gèu, cau destacar-ne ua: era impermeabilizacion des piscines.
Damb aguesta intervencion, se preve corregir es filtracions d’aigua enes vestiaris e eliminar es molèsties as usatgèrs. Amassa damb aguesta inversion, tanben se haràn accions puntuaus entà canalizar er aigua de bères sales e frenar definitiuaments es efèctes des principaus goterèrs.
Eth temps que s’a requerit entà melhorar aguesti aspèctes a comportat era suspension der accès as piscines pendent ua setmana mès deth qu’ ère previst. Maugrat açò, Juan Antonio Serrano confie que ‘era demora valerà era pena, pr’amor que se corregirà un ahèr que hège temps qu’ère un motiu de planh per part des usatgèrs’.
23/09/2015