Notícies Veir istoric
Er Ajuntament de Vielha e Mijaran intensifique era neteja enes ièrles de contienedors e auance eth baldejament de carrèrs dempús des temporaus d’aguest iuèrn
Er Ajuntament de Vielha e Mijaran a refortilhat enes darrèri dies es prètzhèts deth servici de neteja municipau, en tot actuar de forma prioritària enes ièrles de contienedors e en tot començar eth baldejament de carrèrs entà retirar era sau e era lordèra acantierada dempús des episòdis de nhèu e es accions de viabilitat iuernau.
Dempús des temporaus e es nheuades, era combinacion d’umiditat, hanga e rèstes de sau provòque qu’eth paviment s’enlordisque damb rapiditat e que determinadi punts deth municipi requerisquen accions mès frequentes.
Aguest iuèrn, mercat per nheuades especiuaments intenses, a comportat un increment der emplec de sau enes trabalhs de viabilitat iuernau, çò qu’a accelerat era acumulacion de lordèra en carrèrs e zònes de recuelhuda de residus.
En aguest contèxt, eth consistòri a decidit auançar es trabalhs qu’abituauments se realizauen de cara ara primauera, damb er objectiu qu’eth municipi se mantengue enes melhores condicions possibles e de melhorar era salubritat e er estat der espaci public.
Es accions se centren ena neteja intensiva d’entorns de contienedors, per èster punts de nauta rotacion, e en baldejament de carrèrs entà favorir era retirada de sau e residus aderidi ath paviment.
Eth consistòri arrebrembe qu’era collaboracion ciutadana ei clau entà mantier nets aguesti espacis comuns, e arregraís eth compromís des vesins e visitants entà hèr un bon emplec des punts de recuelhuda.
“Der Ajuntament de Vielha e Mijaran estant ampliam es trabalhs de neteja des contienedors, pera nauta lordèra acantierada, e auançam eth baldejament des carrèrs a causa dera nauta quantitat de sau e lordèra que s’a mantengut en paviment dempús des granes nheuades d’aguest iuèrn. Eth nòste compromís ei mantier enes melhores condicions possible er estat des espacis publics. D’ací qu’ajam actuat damb aguesta celeritat”, comente eth baile de Vielha e Mijaran, Juan Antonio Serrano. D’aute biais, soslinhe qu“ei déuer de toti mantier nets e hèr un bon emplec des contienedors entà que se mantenguen en bon estat per fòrça mès temps”.
14/02/2026