Notícies Veir istoric
Eth plen der Ajuntament de Vielha e Mijaran apròve ua mocion de solidaritat e supòrt damb era poblacion de Gaza pes bombardaments continus que patís per part d’Israel
Ath delà, s’a aprovat eth Compde Generau de 2024, damb eth que, gràcies ara bona situacion economica municipau, enguan se pòden hèr tot un seguit d’òbres de milhora en conjunt deth municipi per valor de lèu 4 milions d’èuros
Eth plen der Ajuntament de Vielha e Mijaran, amassat aguest dimèrcles en session ordinària, a aprovat ua mocion de solidaritat e supòrt damb era poblacion de Gaza, que hè fòrça temps que viu assetjaments bellics continus per part d’Israel. Ua mocion damb era que se demane que pogue arturar-se çò de mès lèu possible quinsevolh tipe de bombardament ara poblacion civila e eth trincament de relacions damb Israel.
D’aute biais, s’a aprovat eth Compde Generau de 2024, damb eth que, gràcies ara bona situacion economica municipau, enguan se pòden hèr tot un seguit d’òbres de milhora en conjunt deth municipi. Aguest punt a compdat damb es vòts a favor deth grop d’Unitat d’Aran e era abstencion dera oposicion de Convergéncia Aranesa e Aran-Amassa.
“D’ençà der Ajuntament de Vielha e Mijaran credem qu’ei de besonh mostrar eth nòste supòrt ath pòble de Gaza en aguesti moments complicadi en que se bombardège ara sua poblacion, a on patissen autant joeni coma grani. Cap pòble ne territòri merite aguest patiment, coma eth que li genère Israel damb es sòns atacs indiscriminadi”, comente eth baile de Vielha e Mijaran, Juan Antonio Serrano.
D’aute biais, Serrano a destacat era bona situacion economica que viu eth consistòri, pr’amor qu“auem ua economia sanejada, dempús d’ans de non poder invertir, en tot complir es règles fiscaus e de despena, hèt que favorís qu’enguan pogam auer enquia 10 òbres en marcha per valor de lèu 4 milions d’èuros entara milhora globau deth municipi”.
13/08/2025