Notícies Veir istoric
Vielha e Mijaran encète eth calendari d’eveniments esportius d’ostiu aguest pròplèu 14 de junh, damb eth que se demore competicions de naut nivèu internacionau pendent es mesi de junh e seteme
Vielha e Mijaran tornarà a èster er epicentre de nauta montanha en çò que tanh a competicions esportiues en desparières disciplines coma trail-running, ciclisme e mototorisme
Vielha e Mijaran acuelh pendent es pròplèu 3 mesi un vast calendari esportiu de naut nivèu, en desparières disciplines, en tot plaçar ath municipi coma epicentre esportiu deth conjunt deth Pirenèu.
Des der Ajuntament de Vielha e Mijaran s’a trabalhat intensament, en collaboracion damb es organizacions des competicions, entà poder aufrir es milhors condicions deth nòste municipi (pòbles e païsatges naturaus), entà qu’aguest ostiu torne a èster un succès coma ei abituau.
Aguest mes de junh, eth calendari comènce aguesta dimenjada damb era celebracion deth torneg 30 Ores de Fotbòl Sala Vila de Vielha en Palai d’Espòrts e era Vertical d’Aran en parçan deth Montcorbison. Era Hard Bike arribarà eth 19 de junh, era Pedals de Foc Non Stop (28 de junh), qu’enguan artenh era sua 19au edicion, acuelherà era participacion de 1000 ciclistes, que trauessaràn bona part dera orografia deth Pirenèu, e que compde damb Vielha coma lòc de gessuda e d’arribada.
Atau madeish, cau remercar qu’era Val d’Aran by UTMB que se celèbre deth 2 ath 6 de junhsèga tornarà a èster, un an mès, era pròva damb mès participaires. Era 5au edicion d’aguesta competicion de trail running amassarà a mès de 6000 participaires. Sense dobte, aguesta pròva ja s’a plaçat coma era màger competicion de trail running der Estat, e Vielha tanben compde coma lòc de gessuda e d’arribada de bona part des distàncies, sustot des mès longues. Ua pròva, qu’ath delà, serà retransmetuda en dirècte, pendent es 5 dies que dure, per tota Euròpa e tanben enes Estats Units, Canadà e era China. Sonque aguesta competicion ja compòrte ua repercusion economica de mès de 4 milions d’èuros.
Eth 12 de junhsèga, tornaram a acuélher ua naua edicion dera Trail Vielha-Molières que tanben ei un classic deth trail running, e qu’amassarà a mès de 1000 corredors d’Espanha e diuèrsi païsi europèus en nòste municipi.
En çò que tanh ath ciclotorisme, eth 26 de junhsèga Vielha acuelherà era gessuda e arribada dera Vielha Cycling Tour, ua modalitat non competitiua que trauèsse bona part des pòrts de montanha dera Val d’Aran e sud de França e que, pòc a pòc, creish en nombre de participaires.
En agost, eth running tornarà a préner protagonisme damb Era Nocturna de Vielha e era Corsa e Caminada des 15 Pòbles, damb Vielha tanben coma epicentre.
Era Rodibook, amassada mototorista non competitiua, aterrarà un an mès en Vielha era dimenjada deth 5 e 6 de seteme, tanben damb pròp de 1000 participaires, e que supausarà era fin des eveniments esportius en ostiu.
Tot aguest calendari esportiu aurà ua repercusion milionària, deth quau s’en beneficiarà tot eth conjunt deth sector toristic de Vielha e Mijaran, que trabalharà a plen rendiment pendent es mesi de junhsèga e agost.
“Des der Ajuntament de Vielha e Mijaran auem trabalhat entà recéber, un ostiu mès, tota ua sòrta d’eveniments esportius que placen a Vielha e Mijaran en mapa internacionau der espòrt en desparières disciplines (ciclisme, trail running e mototorisme), e que mantierà ath sector toristic trabalhant de valent pendent tot er ostiu”, comente eth baile de Vielha e Mijaran, Juan Antonio Serrano. E ahig que “era màger part d’aguesti eveniments an Vielha e Mijaran coma lòc de gessuda e d’arribada, que favorirà ua grana sason d’ostiu, damb fòrça torisme, fòrça espòrt, en tot plaçar-mos coma era destinacion preferenta e que mès eveniments esportius organize en tot Pirenèu”.
09/06/2025