Notícies Veir istoric
Eth plen der Ajuntament de Vielha e Mijaran apròve era suspension temporau des abilitacions administratiues des abitatges d’us toristic (AUT)
Aguesta mesura servís entà qu’eth consistòri pogue adaptar era sua normatiua urbanistica en aguest ahèr ath decrèt lei 3/2023 dera Generalitat de Catalunya de mesures urgentes sus eth regim urbanistic des abitatges d’us toristic
Eth plen der Ajuntament de Vielha e Mijaran, amassat en session ordinària, a aprovat aguest maitin era suspension des abilitacions administratiues as abitatges d’us toristic (AUT). Aguesta aprobacion a compdat damb es vòts a favor der equip de govèrn d’Unitat d’Aran e eth grop municipau d’Aran-Amassa, mentre que Convergéncia Aranesa a dividit eth vòt, damb dus vòts d’abstencion e un vòt en contra.
Aguesta mesura supause era aprobacion d’ua naua moratòria ena concession de licéncies entad aguest tipe d’abitatges pendent un an. D’aguesta manèra, eth consistòri daurís un periòde entà adaptar era sua normatiua urbanistica en aguest ahèr damb eth decrèt lei 3/2023 dera Generalitat de Catalunya de mesures urgentes sus eth regim urbanistic des abitatges d’us toristic.
Vielha e Mijaran siguec en 2019 un des municipis pionèrs en Espanha ena aplicacion d’ua modificacion urbanistica enes Normes Subsidiàries entà arturar era proliferacion des licéncies d’abitatges d’us toristic. Alavetz eth consistòri reconeishec era existéncia des AUT, mès restringic fòrça er autrejament de licéncies. En aguest sens, sonque i podie auer aguesti abitatges en viuendes unifamilhares e en cases vielhes a on totes es viuendes que se genèren siguen AUT. Ath delà, i auie d’auer un minim d’ua plaça de parcatge garantida.
Aguesta mesura a supausat un succès important entà arturar era aparicion de naues licéncies d’AUT, pr’amor que de 2019 ençà, er Ajuntament de Vielha e Mijaran sonque a concedit un totau de 12 licéncies naues. Ath delà cau remercar qu’ath torn deth 90% des licéncies que i a en Vielha e Mijaran des AUT son de gent de dehòra, e sonque eth 10% apertien a gent locau.
“En 2019 ja hérem ua modificacion urbanistica entà regular e, sustot, restringir era preséncia des abitatges d’us toristic en municipi. Ua mesura qu’a estat un gran succès pr’amor qu’eth numèro de licéncies concedides d’alavetz ençà ei fòrça baish. Es mesures son plan restrictiues e aquerò a ajudat fòrça, mès ara, a arraïtz dera aprobacion deth decrèt lei dera Generalitat en Catalunya en 2023, auem d’adaptar era nòsta normatiua ara qu’eri establissen, d’ací que s’age aprovat aguesta suspension temporau”, comente eth baile der Ajuntament de Vielha e Mijaran, Juan Antonio Serrano. “Gràcies a qu’en 2019 aprovèrem era modificacion urbanistica respècte as AUT, ara sonque mos cau adaptar ath decrèt lei dera Generalitat. Totun, toti aqueri ajuntaments qu’en sòn dia non ac heren, non pòden concedir cap tipe de licéncia e an de hèr çò que nosati hérem en 2019”, ahig Serrano.
D’aute biais, Serrano se planh peth posicionament de Convergéncia Aranesa en aguest ahèr, “pr’amor que damb eth vòt dividit qu’an efectuat, demòstre que non an un posicionament unic e clar en un ahèr plan important entath municipi coma son es abitatges d’us toristic, que dificulten er accès ara viuenda a joeni e trabalhadors”.
28/05/2025