Notícies Veir istoric
Vielha e Mijaran a inscrit un solar ena prumèra convocatoria dera resèrva publica de solèr dera Generalitat de Catalunya, damb capacitat entà ua setantia de viuendes protegides
Aguest solar se trape en parçan dera Tuca (Betren) en ua superfícia totau de 5.260,02 m²
Vielha e Mijaran acabe d’inscriuer un solar ena resèrva publica de solèr dera Generalitat de Catalunya. Aguest terren de 5.260,02 m2 se trape ath pè dera montanha dera Tuca, en Betren, en tot balhar ua capacitat entà ua setantia de viuendes protegides, apruprètz. Un terren que siguec escuelhut, precisaments, pera nauta capacitat de viuendes que poderie acuélher, e era ampla superfícia dera que se compause.
Aguest solar hè part dera resèrva de solèr dera Generalitat de Catalunya entà crear ua resèrva publica de solars entà poder accedir a desparières linhes d’ajuda ena promocion de viuendes de proteccion oficiau en Catalonha.
Vielha e Mijaran ei eth prumèr municipi dera Val d’Aran qu’a aufrit, oficialaments, un solar en registre dera resèrva publica de solars catalana entà poder-i bastir viuendes assequibles.
Era competéncia en matéria de viuenda publica ei titolaritat dera Generalitat de Catalunya, e hè fòrça ans que non bastís viuenda de proteccion en municipi, a on non dispause de terrens pròpris.
Des der Ajuntament de Vielha e Mijaran tostemp i a auut era volontat de facilitar e méter es solars a disposicion des administracions publiques e entitats privades entà poder-i bastir viuenda assequibla, entà que quinsevolh pogue auer facilitats en sòn accès. En 2024, er Ajuntament de Vielha e Mijaran ja facilitèc un inventari de terrens de titolaritat deth pròpri consistòri, ath Conselh Generau d’Aran, a on s’i poderie bastir abitatge public.
Vielha e Mijaran ei un municipi qu’a grèu problèmes en accès ar abitatge per part de trabalhadors que i viuen tot er an, e entara joenessa. En 2024 Vielha e Mijaran s’includic en listat de municipis que hèn part des zònes tensionades per part deth Govèrn dera Generalitat de Catalunya entà poder limitar eth prètz deth loguèr des abitatges, dempús de comprovar era tendéncia deth mercat a pujar eth prètz d’aguesti loguèrs.
“Vielha e Mijaran a un grèu problèma d’accès ara viuenda e des der equip de govèrn municipau trabalham entà trapar solucions ad aguesta problematica. Des deth consistòri trabalham amassa damb eth Conselh Generau d’Aran e damb d’auti municipis damb qui compartim era participacion ena Taula d’Abitatge, entà definir es estratègies e accions de besonh tà dar gessuda ara actuau problematica der abitatge en territòri e garantir-ne er accès accessible e de besonh entara populacion residenta”, comente eth baile de Vielha e Mijaran, Juan Antonio Serrano. E ahig que “seguiram en tot méter facilitats en aguest ahèr entà qu’enes solars aufrits si pogue bastir viuenda sociau. Aguest solar pòt arribar a generar ua setantia d’abitatges, apruprètz, d’aguest tipe en municipi”.
14/05/2025