Notícies Veir istoric
Er Ajuntament de Vielha e Mijaran encargue era redaccion d’un projècte entà renauir er engondronatge de viaus, era reabilitacion de trepadèrs e senhalizacions en diuèrsi carrèrs de Vielha
Aguest projècte milhorara un totau de 32.280 mètros quarradi de vies publiques que refortilhe eth compromís der equip de govèrn de seguir en tot milhorar er estat des espacis publics deth cap-lòc dera Val d’Aran
Er equip de govèrn der Ajuntament de Vielha e Mijaran a encargat era elaboracion d’un projècte damb er objectiu de milhorar er estat de diuèrsi carrèrs de Vielha.
Aguest projècte consistís en engondronatge, era reabilitacion de trepadèrs e eth plaçament de senhalizacions verticaus e orizontaus en bona part des espacis publics deth cap-lòc dera Val d’Aran.
Era elaboracion d’aguest projècte compde damb un pressupòst de 18.089,50€, en tot englobar ua vasta milhora des carrèrs de Vielha damb 32.280 mètros quarradi qu’encara demoren per recéber ua intervencion.
Aguest projècte refortilhe eth compromís der equip de govèrn de seguir en tot modernizar eth cap-lòc dera Val d’Aran, que pòrte fòrça ans en tot implementar importanti projèctes qu’an supausat ua modernizacion des carrèrs de Vielha. En aguest sens, a compdar de 2022 se desvolopèc un vast projècte de milhora e renauïment des trepadèrs de diuèrsi encastres, e qu’aué ei finalizat.
D’aute biais, tanben ei previst enguan eth projècte de reurbanizacion deth carrèr des Comets plaçat en Solan, en tot convertir-lo en ua naua plaça. Er objectiu principau de tot aguest projècte ei qu’aguesta naua plaça sigue un punt de trobada, de relacion e socializacion des vesins deth Solan de Vielha, pr’amor qu’en tot aguest endret non existís cap tipe de plaça.
“Der equip de govèrn de Vielha e Mijaran estant portam fòrça ans en tot desvolopar era regeneracion urbana e era milhora der estat des carrèrs de Vielha, que supause non sonque ua milhora dera mobilitat e seguretat des pròpris carrèrs, senon que refortilhe era imatge qu’a d’auer Vielha coma destinacion de referéncia de nauta montanha enes Pirenèus”, comente eth baile de Vielha e Mijaran, Juan Antonio Serrano. E ahig que “as nomentades milhores urbanistiques ei de besonh ahíger es projèctes de modernizacion des servicis, especiaument dera aigua correnta e aigües lordes de Vielha”.
11/02/2025