Notícies Veir istoric
Vielha acuelherà aguest pròplèu 1 de hereuèr era presentacion dera 45au Marxa Beret d’esquí de hons
A compdar des 19:30, eth Centre Polivalent de Vielha e Mijaran balharà era benvenguda oficiau as participaires dera pròva esportiua mès importanta dera Val d’Aran e que demore ua participacion ath torn des 800 participaires
Tot ei prèst entà qu’arrinque ua naua edicion dera Marxa Beret d’esquí de hons, qu’enguan artenh era 45au edicion, e qu’a a Vielha coma un des sòns epicentres pendent es dies 31 de gèr e 2 de hereuèr.
Coma ei d’abituda, eth Centre Polivalent serà er escenari dera presentacion oficiau dera pròva eth dissabte 1 de hereuèr entàs 19:30. Atau madeish, eth madeish dia, entàs 19:00, acuelherà era ceremònia de prèmis deth Campionat d’Espanha “Sprint” qu’aurà lòc peth maitin en Plan de Beret.
D’aute biais, es dies 31 de gèr e 1 de hereuèr, aguest madeish espaci tanben supausarà era Sala d’Inscripcions entàs participaires que decidissen formalizar era sua inscripcion personaument.
Enguan se demore ua participacion fòrça anauta, ath torn des 800 participaires, en tot disputar es pròves abituaus de 10, 21 e 42 kms en Plan de Beret ena jornada de dimenge dia 2 de hereuèr. Atau madeish, eth dia 1 aurà lòc eth Campionat d’Espanha “Sprint”.
“Vielha hè fòrça ans qu’a un papèr fonamentau ena organizacion dera Marxa Beret. Eth Centre Polivalent acuelh era presentacion oficiau, eth liurament de prèmis dera competicion d’sprint e, ath delà, acuelh tanben era Sala d’Inscripcions”, comente eth còsso d’espòrts de Vielha e Mijaran, David Moreno. E ahig que “Vielha e Mijaran ei un municipi qu’apòste fermament pes espòrts d’iuèrn e, en aguest cas, era nòsta collaboracion damb era principau competicion esportiua d’iuèrn dera Val d’Aran se manten un an mès, e atau seguiram en tot ajudar en tot lo que sigue possible entà que sigue un succès”.
30/01/2025