Notícies Veir istoric
Er Ajuntament de Vielha e Mijaran encargue era redaccion de diuèrsi projèctes entà milhorar es installacions deth Palai de Gèu
En totau son 5 projèctes: produccion de calor e climatizacion, installacion de lampisteria ACS e AFS, installacion electrica e enlumenat, installacion de desumidificacion e ventilacion e installacion deth circuit dera piscina e vas de compensacion
Er equip de govèrn der Ajuntament de Vielha e Mijaran desvolope un ambiciós projècte de milhora deth Palai de Gèu, en çò que tanh ath sòn manteniment, atau coma era milhora dera eficiéncia energetica.
En aguest sens, s’a encargat era redaccion de 5 projèctes fonamentaus ara enterpresa ESITEC ENERGIA (adjudicatària dera licitacion): produccion de calor e climatizacion, installacion de lampisteria ACS e AFS, installacion electrica e enlumenat, installacion de desumidificacion e ventilacion e installacion deth circuit dera piscina e vas de compensacion. Era soma totau dera redaccion d’aguesti projèctes ei de 150.935,40€ (IVA includit), que mòstre era grana magnitud des projèctes qu’auràn d’amiar-se a tèrme en futur. Toti aguesti projèctes apartien a intervencions que s’auràn d’amiar ena prumèra planta dera bastissa.
Eth Palai de Gèu de Vielha ei ua installacion qu’arrosigue grèus problèmes estructuraus de hè fòrça ans, e que pendent es darrèri ans a obligat ath sòn barrament, coma per exemple en 2018 per ua pana en servici de refrigeracion dera pista de gèu, qu’acabèc damb era substitucion dera pista, o eth barrament de 2021 peth grèu estat en que se trapaue era estructura.
Tot açò somat ara importanta inversion annau que deth consistòri estant se realize enes pressupòsti en tot supausar eth 20% des compdes publics. Cau remercar que s’a artenhut era ajuda de diuèrses administracions coma son es casi dera Deputacion de Lhèida, que hè diuèrsi ans qu’apòrte ua quantitat fixa e, tanben darrèraments, damb ua collaboracion deth Conselh Generau d’Aran. Mès son inversions insufisentes pera grana magnitud dera installacion.
Ath delà, eth consistòri establic un acòrd de collaboracion damb era UFEC a qui se li encarguèc un estudi de viabilitat e qu’a acabat damb era creacion d’un plan de manteniment der equipament esportiu, e damb qui s’a vist milhorat eth servici que s’aufrís en Palai de Gèu, sustot, damb un aument dera quantitat d’activitats que s’amien a tèrme.
Eth Palai de Gèu ei era principau installacion esportiua de Vielha e Mijaran e de tota era Val d’Aran, en tot balhar servici abituau as aranesi e as visitaires pendent tot er an, damb un vast numèro de practiques esportives. Ei er unic lòc a on se pòt practicar natacion e espòrts de gèu de forma abituau, e des pòques pistes de gèu qu’encara balhen aguest servici en Catalonha e bona part d’Espanha.
“Entar equip de govèrn de Vielha e Mijaran eth Palai de Gèu ei un pilar fonamentau e atau volem que seguisque en futur. Per açò auem encargat era redaccion d’un seguit de projèctes que velharàn per milhorar es condicions que presente er equipament de cara as pròplèu ans”, comente eth baile der Ajuntament de Vielha e Mijaran, Juan Antonio Serrano. E ahig que “de 2015 ençà, auem trabalhat de valent entà poder mantier e milhorar es condicions deth Palai de Gèu. Auem passat epòques complicades damb barraments obligadi pes grèus damatges dera installacion, mès era nòsta volontat ei que seguisque en tot èster eth referent esportiu dera Val d’Aran e deth Pirenèu”.
29/01/2025