Notícies Veir istoric
Era Pedals de Fòc Non Stop arribe ena sua desau edicion e se convertís en eth Campionat d’Espanha de Ultramarathon.
Aguesta dimenjada deth 4 ath 5 de junhsèga se celèbre ena Val d’Aran era 10au. edicion de Pedals de Fòc Non Stop damb granes novetats entàs participaires, en tot convertir-se en eth Campionat d’Espanha de Ultramarathon. Servirà entà conéisher ath biker mès resistent deth país, damb es sòns 220km e 6.200 mètres de desnivèu supause un rèpte de dimensions majuscules entà toti es participaires.
Ena ròda de premsa celebrada ena sala de plens der Ajuntament de Vielha, Juan Antonio Serrano, alcalde deth municipi, a metut er accent principauments ena importància des eveniments esportius entara economia locau e era indústria toristica. Un totau de 1500 pernoctacions seràn possibles pendent era dimenjada gràcies ara organizacion der esveniment e as volontaris que s’impliquen entà que Vielha e Mijaran sigue referent esportiu de montanha. Segontes a informat Pep Vega enguan es expectatives son mès nautes que jamès, e era carrèra baterà eth sòn recòrd d’inscriti en mès de 50%. Damb gessuda e arribada en Vielha, aqueri que non se veiguen damb fòrça entà afrontar eth recorregut dera corsa pòden optar pera categoria argent, ena quau se realize eth traçat en dus dies, en tot parar a dormir en Espot, en quilomètre 150 dera carrèra. Ath delà dera sua exigéncia fisica era Pedals de Fòc Non Stop gratifique as sòns bikers en tot rodar per paratges d’excepcion en ua zòna privilegiada des Pirenèus. Eth sòn recorregut, qu’entornege eth Parc Nacionau d’Aigüestòrtes, a coma punt culminant eth “Collado de Portella Blanca”, damb 2.268 mètres de nautada e ath que s’arribe dempús de superar eth pòrt mès emblematic dera corsa, eth Còth deth Triador, designada “Cresta Iñaki Lejarreta”. Eth totau poiríem dividir era corsa en 7 ascensions, eth Còth deth Triador n’ei era mès longa damb es sòns 12km a 7,5% de desnivèu miei, encara qu’eth tram mès inclinat seràn es 3,8km deth Còth de Serreres damb 9,3% de desnivèu. Eth dissabte as 05:00 ores començarà era corsa e ei previst que comencen a arribar es corredors sus es 15:30 ores en Passeig dera Libertat de Vielha. Enguan ath delà compdaram damb era participacion de 10 corredors aranesi. Eth dimenge as 12:00 ores s’ harà eth liurament de prèmis.
03/07/2015