Notícies Veir istoric
Es dies 26 e 27 de març Vielha tornarà a èster er epicentre deth fotbòl femenin damb era celebracion deth 12au Tornèg Femenin de Fotbòl Sala de Vielha
Entà Pasca arribe un des classics esportius des darrèri ans en Vielha e Mijaran: Eth Tornèg Femenin de Fotbòl Sala de Vielha qu’organize era AEFA (Associacion Esportiua Fotbòl Aran) amassa damb era Penha Barcelonista dera Val d’Aran. Enguan aguesta competicion arribe ara 12au edicion, en tot auer-se assolidat coma un referent esportiu en municipi.
Pendent es tardes des dies 26 e 27 de març eth Palai d’Espòrts de Vielha torne a èster er escenari d’un tornèg que compde damb era collaboracion der Ajuntament de Vielha e Mijaran, e qu’enguan compde damb un nau rècord de participacion, damb un totau de 8 equips inscrits. Ua grana notícia, pr’amor que mòstre eth naut interés des hemnes en préner part d’aquest tornèig.
Totes es jogadores receberàn un present, un diplòma damb era classificacion artenhuda, es tres melhors equips receberàn un trofèu, ath delà dera melhora jogadora e era maximala golejadora.
“Vielha e Mijaran assolide ua competicion esportiua que ja ei fixa en calendari annau en ua des installacions municipaus, coma ei eth Palai d’Espòrts. Un tornèig qu’amasse a fòrça jogadores dera Val d’Aran e que fòrça gent s’apròpe a gaudir en tot profitar es hèstes de Pasca”, comente eth còsso d’espòrts de Vielha e Mijaran, David Moreno. E ahig que “felicitam ara organizacion peth nau rècord d’inscripcion, en tot méter en valor era importància d’aguest campionat e, sustot, era bona salut que manten damb eth pas des ans”.
24/03/2024