Notícies Veir istoric
Vielha tornarà a èster er epicentre deth milhor cinèma de montanha deth mon damb era 3au edicion deth Banff Mountain Film Festival es dies 29 e 30 de març
Un viatge mès, eth cap-lòc dera Val d’Aran recep ath hestau mès veteran e prestigiós de cinèma de montanha, aventura e espòrt extrèm a nivèu internacionau, qu’enguan tanben a sedença en Jaca, Castejón de Sos e Benasque
Eth Banff Mountain Film Festival atèrre per tresau viatge en Vielha. Aguest hestau ei un referent a nivèu internacionau entàs montanhaires, fotògrafs, escrivans, esportistes e amants deth cinèma de montanha de tot eth mon.
Eth Banff Mountain Film Festival s’inaugurèc en an 1976, e des d’alavetz a agut 550 sedences internacionaus, damb mès de 1300 projeccions, en tot arribar a auer ua audiéncia de 550.000 espectadors.
Es dies 29 e 30 de març, eth cap-lòc dera Val d’Aran se some ath tour mondiau d’aguesta eveniment, qu’aguest iuèrn compde enes Pirenèus tanben damb sedença en Jaca, Castejón de Sos e Benasque. Ua escadença entà assolidar Vielha e Mijaran coma referent tanben ena projeccion de cinèma de montanha, aventura e espòrt extrèm.
Entà d’aquera dimenjada, en Era Audiovisuau de Vielha s’a premanit un programa d’activitats fòrça complèt restacat damb era montanha: Eth 29 de març, s’encetarà eth hestau entàs 18:30 damb eth film “Know Before You Go”, ua iniciatiua d’ACNA (Asociación Conocimiento Nieve y Aludes) damb ua posterior charrada e debat. Dempús i aurà era charrada de Marta Jiménez sus “La Guinda del Pastel” e, fin finau, era projeccion de diuèrsi films (“Fuego”, “El Gavilán” e “Chronoception”). Eth 30 d’abriu, entàs 19 ores, er aupinista Denis Urubko impartirà era conferéncia “Back to the future of 8000m” en tot explicar era sua experiéncia en tot coronar es montanhes mès nautes deth mon. Entà finalizar, se poderà veir ua dusau projeccion de films, damb “Desert Wings”, “Soundscape”, “Going Greenland, “Well Worn Life Dani”, e “Reel Rock:DNA”.
Abans, eth 28 de març, era Bibliotèca Generau de Vielha, acuelherà eth talhèr participatiu “Y tú ¿cuánto sabes de nieve y aludes?”.
Ja se pòden crompar es abonaments entàs dus dies der hestau, en tot accedir ara plana web: https://entradium.com/es/events/abono-2-dias-banff-vielha
“Èm fòrça contenti de poder recéber en nòste municipi, un an mès, eth Banff Mountain Film Festival. Ua grana notícia entà toti es amants dera montanha e es espòrts que s’i practiquen, e quin milhor lòc que Vielha entà poder projectar films e poder escotar es viuences des expèrts ena matéria”, comente eth baile de Vielha e Mijaran, Juan Antonio Serrano. E ahig que “des der Ajuntament de Vielha e Mijaran apostam per seguir en tot èster ua destinacion referent de nauta montanha enes Pirenèus, e ac volem refortilhar tanben en airau des hestaus de cinèma de montanha”.
19/03/2024