Notícies Veir istoric
Er Ajuntament de Vielha e Mijaran inície es òbres de reabilitacion deth depòsit d’aigua de Vila
Aguest equipament se trape en un estat maumerenc a conseqüéncia deth pas deth temps, e s’adaptarà as besonhs actuaus de qualitat, potabilitat e garantia de subministrament, en tot eliminar es pèrtes d’aigua e refortilhar era sua seguretat
Er Ajuntament de Vielha e Mijaran a iniciat pendent aguesta setmana es trabalhs de milhora deth depòsit d’aigua deth pòble de Vila. Ua intervencion tanplan de besonh, pr’amor qu’aguest equipament ei fòrça vielh, e s’a adaptar as estandards de qualitat, potabilitat e garantia de subministrament dera poblacion actuau. Se reabilitarà e condicionarà entà un milhor foncionament e optimizacion.
Prumerament, s’inícien es trabalhs de milhora en accès ath depòsit, pr’amor que se trape en ua zòna de montanha tanplan arribenta ath nòrd deth pòble de Vila, e ei fòrça dificil accedir-i.
Aguest depòsit, ath delà, presente pèrtes e filtracions importantes d’aigua que s’an de solventar. E tanben ei previst refortilhar era seguretat dera part de dessús deth madeish depòsit.
Se bastirà ua bastissa annexa entà poder plaçar-i eth depòsit de subministrament deth clorament, ua auta bastissa annexa entà plaçar-i era caseta des valvules de maniòbra en tot generar un espaci entà meter-i es canerades d’entrada e gessuda der aigua. Ath delà, s’i bastirà un barrament perimetrau entà evitar er accès ath depòsit, un barrament superior en perimètre des vasi entà milhorar era seguretat en mantenement e s’i plaçaràn ues escales damb fibra de veire entà evitar eth desnivèu e poder amiar a tèrme eth mantenement deth depòsit.
Mentre duren es òbres se uedarà temporaument eth depòsit de resèrva. En aguest sens, se regularà eth subministrament d’aigua ara poblacion des d’un depòsit provisionau de PVC entar aigua sanitària, en tot profitar eth by-pass existent, de manèra que s’assegure eth sòn subministrament.
Era execucion d’aguesti trabalhs ei imminenta e durarà diuèrses setmanes, e compde damb un pressupòst totau de 106.469,22€.
“Auem iniciat es trabalhs de reabilitacion deth depòsit d’aigua deth pòble de Vila, qu’ère fòrça de besonh, pr’amor qu’ère vielh e calie adaptar-lo as besonhs dera poblacion actuau”, comente eth còsso d’òbres e servicis de Vielha e Mijaran, Jacint Cuny. E ahig que “er equip de govèrn de Vielha e Mijaran seguís damb eth compromís d’apariar e milhorar toti es depòsits d’aigua deth municipi, en tot garantir eth sòn corrècte foncionament e subministrament”.
20/03/2023