Aubert
INFORMACION
AUBÈRT
Ei eth prumèr pòble que trobam a pè de carretèra en tot gésser de Vielha en direccion entà França, e a un coriós camarat urban e era sua tipica arquitectura civiu aranesa s’adapte simbioticament as formes capricioses des petits carrèrs. Aubèrt ei eth punt de gessuda de quauques des rotes per endrets de gran beresa coma eth Bòsc de Baricauba. Eth pòble qu’ei presidit pera glèisa romanica, que s’inscriu en Romanic més tipic d’Aran.
BETLAN
Era poblacion qu’ei plaçada en plan ara dreta deth Garona, entornejada de camps de cultiu e prats. Es pòques cases que la formen se placen ath torn d’ua grana plaça barrada a ponent pera glèisa parroquiau. En documents medievaus apareish eth pòble damb es formes Bella, Bela, Bellano e Betlano.
MONT
Aguest poblet deth ’terçon’ dera Marcatosa de pòc mès de 15 abitants censats s’auce en punt anautit que li apòrte ues vistes privilegiades sus Vielha, especiuaments se se puge tath Plan de Mont, lòc a on ja se percep era influéncia des mines Margalida. Era glèisa parroquiau de Mont s’inscriu en estil romanic deth sègle XII e ei dedicada a Sant Laurenç, un des prumèrs martirs dera Glèisa catolica, de qui fòrça hònts placen es sues origines en Òsca, e tanben utilizat entara cristianizacion de Lug, eth diu cèlta dera lutz.
MONTCORBAU
Plaçat a 1222 mètres d’altitud e sonque a 3,5 kms de Vielha, Montcorbau a ues polides vistes des montanhes de Sarraeta e deth Tuc Nere, es sòns cims blanqui contrasten damb eth païsatge verd deth frondós bòsc dera Baricauba que s’obsèrve en hons dera val. Era sua glèisa parroquiau ei dedicada a Sant Esteban e, maugrat es sues origines romaniques, a incorporat damb eth pas des sègles eth legat artistic deth Gotic e deth Barròc, mès çò que mès cride era atencion deth visitant ei eth mercat gost popular der interior dera bastissa, qu’arrebrembe fòrça ath de Sant Joan de Boí.
