Eth plen der Ajuntament de Vielha e Mijaran modifique es Normes Subsidiàries e Planejament des parcèles deth parc de Pompièrs de Mijaran en tot auer era qualificacion d’equipament comunitari
Ath delà, s’a aprovat era revision e actualizacion deth Document Unic de Proteccion Civiu Municipau (DUPROCIM) qu’ère caducat des de 2023
Eth plen der Ajuntament de Vielha e Mijaran, amassat aguest dimèrcles en session ordinària, a aprovat per unanimitat des grops politics municipaus era modificacion des Normes Subsidiàries e Planejament dera Val d’Aran, respècte ath Plan Parciau de Mijaran, entà cambiar era qualificacion des parcèles qu’actuaument aucupe eth parc de Pompièrs. Es dues parcèles aquerides a Endesa en 2002, a compdar d’ara, responen ara qualificacion d’equipament comunitari.
D’aute biais, eth plen tanben a aprovat era revision e actualizacion deth Document Unic de Proteccion Civiu Municipau (DUPROCIM) qu’ère caducat des de 2023.
Atau madeish, s’a aprovat era delegacion, a compdar de 2025, dera requectacion des impòsti des güals, aigües lordes e era taxa de cementèri municipau qu’enquiara amiaue a tèrme eth consistòri, ara Deputacion de Lhèida a trauès der Organisme Autonòm de Gestion e Requectacion des Tributs Locaus (OAGRTL).
En d’auti ahèrs deth plen, tanben s’a aprovat eth calendari de hèstes locaus deth municipi, era creacion d’ua plaça de personau eventuau, e era mocion deth grop municipau Aran-Amassa entà prepausar ara Confederacion Hidrográfica del Ebro (CHE) era mantenença der arriu Garona e es sòns afluents. Cau rebrembar, qu’en aguest ahèr, eth govèrn municipau ja hè temps que trabalhe damb era CHE, en tot auer convèrses damb aguest organisme entà qu’actue en suenh deth bon estat que meriten es nòsti arrius.
![](http://vielha-mijaran.org/public/vielha/ftp/noticias/noticia_202407081444299.jpg)
07/08/2024