Notícies Veir istoric
Er Ajuntament de Vielha e Mijaran recep era autorizacion per part dera Confederación Hidrográfica del Ebro entà desvolopar milhores en lhèt der arriu Garona ath sòn pas per Vielha e Betren
Es actuacions previstes comprenen trams urbans e interurbans d’ua longada de 2.957 mètres e ua superfícia totau de 5.294,84 m² en zònes afectades per inundacions
Eth govèrn municipau de Vielha e Mijaran acabe de recéber era autorizacion per part dera Confederación Hidrográfica del Ebro (CHE) entà poder amiar a tèrme tot un seguit d’intervencions que son de besonh en lhèt der arriu Garona, enes nuclèus de Vielha e de Betren.
D’aguesta manèra, era CHE, qui a era autoritat sus es actuacions en airau d’aguest e era rèsta d’arrius dera Val d’Aran, a escotat es demanes que ja hè temps que des deth consistòri se li an transmetut entà poder milhorar era situacion que viu er entorn dera Garona ath sòn pas per andues poblacions.
Es prètzhèts comprenen ua longada totau de 2.957 mètres, en tot aucupar ua superfícia de 5.294,84 m² en zònes afectades per inundacions damb freqüéncia de retorn T50, coma succedic en an 2013 a on er arriu debordèc en tot provocar damatges enes poblacions.
Es trabalhs que consistiràn ena retirada de rominguères invasores qu’aucupen eth laterau der arriu, era neteja des marges e des pònts tà evitar acantieraments vegetaus e era retirada d’arbes mòrti de granes dimensions.
En entorn dera accion i a 6 pònts e ua passarèla entà pedons, es accions definides includissen era neteja des sediments plaçadi en dus d’eri, un doble a on enes sediments i a fòrça vegetacion, arbes e rominguères invasiues e er aute a on era pòca nautor jos eth pònt hè qu’es sediments acumuladi redusisquen era seccion de pas. Era rèsta de pònts se considèren nets e pro adaptadi as creishudes dera aigua.
Es darrèri 230ml dera accion se tròbe en airau protegit Natura 2000 der arriu Garona, en aguest espaci se realizarà un desbroçament en un des lateraus fòrça corbit de vegetacion e era retirada des rominguères invasiues.
Ara, eth consistòri amiarà a tèrme es trabalhs entà poder licitar aguesti trabalhs, en tot desvolopar un projècte d’actuacions que s’alongarà pendent diuèrsi ans.
“Arregraïm ara CHE qu’age escotat es demanes que ja hè fòrça temps que li auem transmetut sus era importància de milhorar er estat de conservacion deth lhèt der arriu Garona en Vielha e Betren. Eth nòste municipi afronte actuauments ua acumulacion excessiva de vegetacion en aguest arriu, çò que represente un risc important entara seguretat des nòsti vesins. Quan era vegetacion creish sense contraròtle, pòt tapoar eth pas dera aigua e aumentar considerablaments eth perilh d’inundacions, especiuaments en epòques de ploges intenses. Era prevencion ei fonamentau. Actuar ara signifique evitar damatges majors en abitatges, infrastructures e terrens agricòles en futur”, soslinhe eth baile de Vielha e Mijaran, Juan Antonio Serrano.
Lieger mès
24/02/2026
Er Ajuntament de Vielha e Mijaran intensifique era neteja enes ièrles de contienedors e auance eth baldejament de carrèrs dempús des temporaus d’aguest iuèrn
Lieger mès
14/02/2026
Er Ajuntament installe malhes entà esvitar esguitlades enes passarèles de husta des arrius Nere e Garona entà refortilhar era seguretat en iuèrn
Lieger mès
13/02/2026
Eth plen der Ajuntament de Vielha e Mijaran apròve eth Plan Estrategic de Subvencions Municipaus de 2026 e 2027
Lieger mès
