Notícies Veir istoric
Er Ajuntament de Vielha e Mijaran s’ahig ath Dia Mondiau dera Activitat Fisica damb un complèt programa d’activitats enes installacions municipaus deth 31 de març ath 5 d’abriu
Pendent toti aguesti dies totes es activitats aufrides seràn gratuïtes, en tot emplegar eth Palai de Gèu, eth Palai d’Espòrts, era pista de pàdel, atau coma ar aire liure
Pendent eth 31 de març e eth 5 d’abriu, Vielha e Mijaran s’ahig ath Dia Mondiau dera Activitat Fisica (que se commemòre eth 6 d’abriu) damb era celebracion d’un ample programa d’activitats gratuïtes qu’auràn lòc enes desparières installacions esportiues municipaus e ar aire liure.
Er Ajuntament de Vielha e Mijaran vò encoratjar ara gent a que pogue amiar a tèrme un minim de 30 menutes d’espòrt ath dia.
En aguest sens, Vielha e Mijaran s’ahig, un an mès, ath calendari d’activitats que hèn part deth Plan d’Activitat Fisica, Espòrt e Salut dera Generalitat de Catalunya a compdar de 2005, qu’a coma objectiu difóner es recomanacions d’activitat fisica entà auer ua bona salut e arténher qu’era poblacion sigue mès activa.
Eth calendari d’activitats ei eth següent:
- Deluns 31 de març: Tennis taula, badminton e basquet (Palai d’Espòrts) des 19:30 as 21:30 e Exercicis saludables laguens der aigua, ena piscina deth Palai de Gèu des 21:00 as 21:45.
- Dimars 1 d’abriu: Marcha Nordica (nivèu healthy, damb gessuda ena plaça dera glèisa) des 18:00 as 20:15, Aquagim “remember” (Palai de Gèu) des 21:00 as 21:45, e Fotbòl sala (Palai d’Espòrts) des 19:30 as 21:30.
- Dimèrcles 2 d’abriu: Aquasalut (Palai de Gèu) des 10:10 as 10:55, Sabes coma foncionen es naues maquines deth gimnàs?, des 21:10 as 21:50 e, Voleibòl, badminton e tennis taula (Palai d’Espòrts) des 19:30 as 21:30.
- Dijaus 3 d’abriu: Marcha Nordica (nivèu healthy, damb gessuda ena plaça dera glèisa) des 18:00 as 20:15, Aquagim “interval” (Palai de Gèu) des 21:00 as 21:45 e, Fotbòl sala femenin (Palai d’Espòrts) des 19:30 as 21:30.
- Diuendres 4 d’abriu: Palai Fit “Jòc deth pingüin” (Palai de Gèu) des 19:15 as 20:45 (Exercici fisic dirigit).
- Dissabte 5 d’abriu: Marcha Nordica (nivèu social, damb gessuda ena plaça dera glèisa) des 09:30 as 13:30.
Ath delà, dissabte 5 d’abriu, i aurà jornada de pòrtes dubèrtes en Palai de Gèu des 10 as 14 ores e des 16:30 as 20:30 (*Non includís era pista de gèu).
Atau madeish, pendent eth 31 de març e eth 5 d’abriu, era pista de pàdel serà gratuïta, en tot auer d’anar a cercar era clau ena recepcion deth Palai de Gèu.
Entà poder inscriuer-se as activitats ei de besonh trucar ath telefòn 973642864.
“Des der Ajuntament de Vielha e Mijaran volem animar ara gent a practicar espòrt, e ac hèm en tot facilitar un ample programa d’activitats gratuïtes enes desparières installacions esportiues municipaus e damb ua jornada de pòrtes dubèrtes ena principau installacion esportiua deth municipi e dera Val d’Aran coma ei eth Palai de Gèu”, comente eth còsso d’espòrts, David Moreno. E ahig que “er espòrt ei de besonh entà poder mantier un estil de vida saludable”.
Lieger mès
28/03/2025
