Notícies Veir istoric
Vielha e Mijaran impulse 14 projèctes entà refortilhar eth provediment d’aigua
Er Ajuntament e es EMD trabalhen amassa entà definir es milhores de ueit captacions e sies depòsits e premanir es següentes inversions enes infrastructures d’aigua deth municipi
Er Ajuntament de Vielha e Mijaran e es entitats municipaus descentralizades impulsen amassa 14 projèctes de mIlhora de captacions e depòsits entà premanir eth futur deth provediment. Eth trabalh amasse ueit captacions e sies depòsits e respon a un objectiu compartit d’anticipar besonhs e planificar es inversions en un servici essenciau entà toti es nuclèus deth municipi.
Era iniciatiua intègre es comandes der Ajuntament e des EMD en ua madeisha estratégia. Era coordinacion permeterà estudiar es besonhs de cada installacion, trabalhar damb critèris comuns de foncionament e mantenença e avalorar alternatiues de subministrament deuant possibles incidéncies o variacions de cabau.
Er Ajuntament finance damb recorsi pròpris era redaccion de dotze projèctes, per un impòrt de 85.145,28 èuros, IVA includit. Abasten es captacions d’Arròs e Vila, Betlan, Betren, Casarilh, Escunhau, Montcorbau, Vilac e Vielha, amassa damb es depòsits de Betlan, Betren, Casarilh e Escunhau.
Ad aguesti projèctes se somen eth deth depòsit de Montcorbau, encargat pera EMD d’Aubèrt e Betlan, e eth deth depòsit de Vilac, impulsat pera sua EMD. Andues comandes compden damb subvencions e hèn part deth madeish plantejament de milhora deth provediment, damb era participacion de cada entitat enes installacions deth sòn entorn.
Ena reünion tecnica deth 21 de seteme se placèren en comuns problèmes, besonhs e possibles solucions. Entre es linhes d’estudi figuren hònts alternatives de subministrament e possibles connexions, qu’auràn d’avalorar-se tecnicaments pendent era redaccion des projèctes.
Aguesta fasa permeterà concretar es accions de besonh e conéisher eth sòn còst abans d’executar es òbres. Preparar es projèctes de forma coordinada son eth pas que permeterà ordenar es futures inversions e balhar contunhitat ath suenh des infrastructures d’aigua, damb ua vision conjunta deth municipi e atencion as besonhs de cada pòble.
“Era aigua ei un servici essenciau e un recors que non podem deishar ara improvisacion. Damb er impuls conjunt d’aguesti 14 projèctes, dam un pas fèrm e estrategic entà assegurar e anticipar eth futur deth provediment en toti es nuclèus deth nòste municipi”, soslinhe eth baile de Vielha e Mijaran, Juan Antonio Serrano. E ahig qu’“aguesta iniciatiua demòstre era importància de trabalhar de forma coordinada damb es Entitats Municipaus Descentralizades, jos ua estratégia comuna que mos permete unificar critèris de mantenença, previer incidéncies e balhar ua responsa solida deuant quinsevolha variacion de cabau. Des der Ajuntament assumim eth finançament dirècte de 12 d’aguesti projèctes damb ua inversion de 85.145,28 èuros, çò que reafirme era nòsta responsabilitat e eth suenh des infrastructures que garantissen era qualitat de vida e eth benèster en cadun des nòsti pòbles”.
Lieger mès
13/10/2026
Er Ajuntament de Vielha e Mijaran informe sus era inscripcion en cens electorau d’estrangèrs residents entàs eleccions municipaus de 2027
Lieger mès
21/09/2026
Ja ei dubèrt eth termini en Vielha e Mijaran entà sollicitar eth forfait de tempsada d’esquí 2026-27
Lieger mès
