Notícies Veir istoric
Er Ajuntament de Vielha e Mijaran impulse eth renauiment des caudères dera Escòla Garona damb ua inversion dera Generalitat de 98.353,28 èuros
Era equipa de govèrn trasladèc dirèctaments eth problèma ara conselhèra d’Educacion en març de 2025, assumic era redaccion deth projècte tecnic e realizèc eth seguiment de besonh
Aguest ostiu se renauissen es dues caudères dera Escòla Garona, ua accion de besonh entà solucionar definitiuaments es panes e incidéncies qu’aguestes equipes acumulauen des de hège ans.
Era origina d’aguesta accion se remonte a març de 2025, pendent era visita dera conselhèra d’Educacion e Formacion Professionau dera Generalitat en Vielha e Mijaran. Era equipa de govèrn municipau li mostrèc dirèctaments es problèmes des caudères e trasladèc eth besonh de trobar ua solucion definitiva entà garantir eth corrècte foncionament deth cauhatge e dera aigua cauda sanitària deth centre.
A compdar d’aquera visita, er Ajuntament e eth Departament acordèren trabalhar amassa. Er Ajuntament assumic era redaccion deth projècte tecnic entà definir era accion e facilitar era sua tramitacion, deth temps qu’eth Departament d’Educacion s’a encargat posterioraments de licitar e contractar era sua execucion.
Eth renauiment supause ua inversion de 98.353,28 èuros IVA includit, assumida pera Generalitat, e permeterà substituïr es dues ancianes caudères de gas ciutat per equipes mès modèrnes, eficientes e fiables. D’aguesta manèra, se redusirà eth risc de panes pendent eth cors e s’aufrirà màger estabilitat e confòrt ar alumnat, ath professorat e ara rèsta de professionaus dera escòla.
“Portàuem temps en tot resòlver panes, mès auíem clar qu’era Escòla Garona auie de besonh ua solucion definitiva. Profitam era visita dera conselhèra entà ensenhar-li dirèctaments eth problèma e reclamar era implicacion dera Generalitat”, a explicat eth tinent d’alcalde e còsso d’Educacion, Alberto López López.
López a soslinhat qu’”eth trabalh der Ajuntament non acabèc ath detectar eth besonh. Redigim eth projècte, insistim e realizam eth seguiment enquia arténher qu’eth Departament actuèsse e assumisse era inversion. Atau suenham era bastissa escolara e evitam qu’eth còst des òbres auessen de requèir sus eth pressupòst municipau”.
Era accion se some as milhores impulsades recentaments ena Escòla Garona, coma er ampliament deth pati, era creacion d’ua naua zòna ajardinada e era plantacion d’arbes frutèrs. Er Ajuntament seguís en tot trabalhar autant enes espacis educatius mès visibles coma enes installacions basiques que hèn possible eth foncionament jornalièr deth centre.
Damb aguest renauiment, era equipa de govèrn complís eth compromís aquerit damb era comunitat educativa e auance ena milhora d’un equipament fonamentau entà Vielha e Mijaran, mejançant ua gestion basada en detectar es problèmes, premanir solucions e deféner deuant es administracions competentes es besonhs deth municipi.
Lieger mès
04/08/2026
Eth Plen der Ajuntament de Vielha e Mijaran impulse naues inversions enes pòbles, auance ena planificacion der accès ar abitatge e garantís era contunhitat des servicis municipaus
Lieger mès
29/07/2026
Vielha auance cap a un nau modèl de jardineria urbana damb era transformacion der entorn de Sant Miquèu
Lieger mès
