Notícies Veir istoric
Er Ajuntament de Vielha e Mijaran daurís un procès de participacion publica entà elaborar era ordenança de proteccion contra era contaminacion acostica
Se daurís un periòde de 20 dies abils entà respóner ua enquèsta que permeterà auer un màger coneishement dera matèria per part dera ciutadania, e qu’ei disponibla ena plana web deth consistòri
Er Ajuntament de Vielha e Mijaran trabalhe ena redaccion d’ua naua Ordenança municipau de proteccion contra era contaminacion acostica. Entà poder arribar a elaborar-la, acabe de daurir un procès de participacion publica entà qu’es vesins e vesies poguen exprimir eth sòn punt d’enguarda.
Es persones interessades poderàn respóner ua enquèsta a compdar d’aué e que demorarà daurit, a compdar de deman, pendent 20 dies abils, a trauès deth següent ligam: https://vielhaparticipa.my.canva.site/
Aguesta enquèsta ei abilitada enes tres idiòmes oficiaus: aranés, castelhan e catalan.
Er Ajuntament de Vielha e Mijaran a constatat, de manèra reïterada, era existéncia de planhs vesiaus per molèsties acostiques qu’afècten era pòsa, era convivéncia e era qualitat de vida, mès que mès ena franja nocturna e en determinadi punts deth nuclèu urban. En particular, s’an identificat problematiques restacades ar òci nocturn, damb incidéncia autant en interior des establiments coma, sustot, ena via publica (coes, humaires, convèrses en ton anautit, aglomeracions, incidents e esgatussades), atau coma molèsties restacades damb era dubertura e barrament continu de pòrtes e era emission de musica amplificada que pòt gésser ar exterior en moments d’entrada e gessuda de clients. Addicionaument, pendent era sason d’ostiu s’organizen eveniments esportius e activitats ar aire liure damb preséncia de megafonia, musica, “villages”, arribades e zònes de concentracion de public, que, pera sua intensitat e recorréncia, pòden generar molèsties as vesins e requerissen ua regulacion clara de condicions, oraris e contraròtle.
Per tot açò, era participacion ciutadana ei fondamentau entà dessenhar ua normativa consensuada.
Er Ajuntament de Vielha e Mijaran encorage a tota era ciutadania a participar activaments en aguest procès, contribuïnt atau a elaborar ua ordenança que respone as besonhs reaus deth municipi.
Atau madeish, s’a abilitat un corrèu electronic de participacion ciutadana entà que quinsevolh persona pogue hèr aportacions, e que seràn degudaments incorporades ena consulta. Aguest corrèu ei participacion@vielha-mijaran.org
Segontes soslinhe eth baile de Vielha e Mijaran, Juan Antonio Serrano, “sabem de tota era problematica que se genère ath torn dera contaminacion acostica, sustot, en quauques sasons der an. En aguest sens, volem qu’aguest ordenança sigue frut deth dialòg e dera participacion ciutadana. Volem era implicacion dera màger quantitat de gent possible, pr’amor que mos implique a toti es vesins e vesies, e que cau gestionar damb critèris clars e consensuadi, entà garantir-ne ua bona convivéncia e respècte entà toti e totes”.
Lieger mès
19/03/2026
Er Ajuntament de Vielha e Mijaran daurís un procès de participacion publica entà elaborar eth reglament d’usatge e resèrva des equipaments esportius municipaus
Lieger mès
16/03/2026
Er Ajuntament de Vielha e Mijaran daurís un procès de participacion publica entà elaborar era ordenança de proteccion, benèster e tinença d’animaus
Lieger mès
12/03/2026
Eth Palai de Gèu barrarà deth 9 ath 12 de març pera realizacion de cates e assagi prealables deth projècte d’apariament dera estructura dera prumèra planta
Lieger mès
