Notícies Veir istoric
Er Ajuntament de Vielha e Mijaran daurís un procès de participacion publica entà elaborar era ordenança de proteccion, benèster e tinença d’animaus
Se daurís un periòde de 10 dies abils entà respóner ua enquèsta que permeterà auer un màger coneishement dera matèria per part dera ciutadania, e qu’ei disponibla ena plana web deth consistòri
Er Ajuntament de Vielha e Mijaran trabalhe ena redaccion d’ua naua Ordenança municipau de proteccion, benèster e tinença responsabla des animaus de companhia. Entà poder arribar a elaborar-la, acabe de daurir un procès de participacion publica entà qu’es vesins e vesies poguen exprimir eth sòn punt d’enguarda.
Es persones interessades poderàn respóner ua enquèsta a compdar d’aué e que demorarà daurit, a compdar de deman, pendent 10 dies abils, a trauès deth següent ligam: https://vielhaparticipa.my.canva.site/
Aguesta enquèsta ei abilitada enes tres idiòmes oficiaus: aranés, castelhan e catalan.
Eth prètzhèt ei dispausar d’un marc clar, actualizat e aplicable que permete: Milhorar era convivéncia en espaci public (carrèrs, places, parcs, zònes infantiles e entorns d’equipaments), redusir es problèmes d’igièna e salubritat derivadi d’excrements e miccions, clarificar es obligacions des persones responsables des animaus (contraròtle, conduccion, identificacion e registre, suenh e benèster), ordenar situacions que generen conflicte vesiau (tapatges persistents, comportaments incivics o reiteradi), regular de forma tecnica e ordenada era gestion de colònies felines mejançant programes CER (captura–esterilizacion–retorn) e mecanismes de mediacion vesiau, adaptar era regulacion municipau ara normativa vigenta e ath contèxte pròpri deth municipi (diuersitat de nuclèus, espaci naturau e afluéncia toristica e establir un regim sancionador proporcionat e efectiu, damb critèris de graduacion e es airines reaus d’aplicacion, entà qu’era nòrma non sigue sonque declarativa, senon operativa.
Era participacion ciutadana ei fondamentau entà dessenhar ua normativa consensuada.
Er Ajuntament de Vielha e Mijaran encorage a tota era ciutadania a participar activaments en aguest procès, contribuïnt atau a elaborar ua ordenança que respone as besonhs reaus deth municipi.
Atau madeish, s’a abilitat un corrèu electronic de participacion ciutadana entà que quinsevolh persona pogue hèr aportacions, e que seràn degudaments incorporades ena consulta. Aguest corrèu ei participacion@vielha-mijaran.org
Segontes soslinhe eth baile de Vielha e Mijaran, Juan Antonio Serrano, “volem qu’aguest ordenança sigue frut deth dialòg e dera participacion ciutadana. Era proteccion, benèster e tinença d’animaus son ahèrs que mos implique a toti es vesins e vesies, e que cau gestionar damb critèris clars e consensuadi, entà garantir-ne ua bona convivéncia e respècte entà toti e totes”.
Lieger mès
12/03/2026
Eth Palai de Gèu barrarà deth 9 ath 12 de març pera realizacion de cates e assagi prealables deth projècte d’apariament dera estructura dera prumèra planta
Lieger mès
05/03/2026
Eth milhor cinèma de montanha deth mon torne tà Vielha es dies 6 e 7 de març damb era 8au edicion deth hestau Mendi Tour
Lieger mès
27/02/2026
Er Ajuntament de Vielha e Mijaran daurís un procès de participacion publica entà elaborar e aprovar eth “Plan Locau de Seguretat Viària de Vielha e Mijaran 2025-2028”
Lieger mès
